Oté

I di k la loi lé fé po lo bien d toulmoun !ti kroi sa ?

Témoignages.re / 18 janvier 2014

An so moman na in nafèr i trakas a moin, dépi lo group « komité lermitaz » la rouv nout zié si léradikasyon la grand povreté dan lo monde avan 2015 ; nou la vi in ka in gramoun sinpol i di a ou li la aksept in èd lo konseyi zénéral po okip son bann vié paran ; astèr zot lé mor, alala i réklame a li sé pa 37.000 éro… alé vann son térin li doi érité po pay lo solidarité li lavé tousé po son paran !!!

Na in léspès larsèlman linstitisyon, prokirèr, ziz, notèr, in léspès mafia ziska in linion asosyasyon familial… Mé li lé po la fami sinon sa li lé kont ? Lo boug i rofiz lo fon solidarité dépi 10 zan éksoprè po pa awar a ranboursé lo zafèr si lo patrimoine… zistoman. Déza lo patrimoine lé pa gro ; si i fo arvann, ou sa lo bann désandan va alé ? sou lo pon ?
Si ou lès fèr ? Minm pa la kestion ! Ti vé k tivé pa ; la fine ni ankété ; lasistant sosial lo konseyi zénéral la fine débarké : ou la poin la ot aspirant ? Ou na lo sat va grif out paran ! Li na savat li na poin pantouf ! Okilé lo kont gestyon ? Troman di, konbiin ti dépans po nouri ton monmon ? Va war si lo montan lé bon ; i sar mézir lo bonèr in paran dan son fami avèk lo bidzé !

Non madame lasistant sosial, non mésié loziz, non madame lo prokiréz, nout kiltir, nout lékilib santimantal, émosyonèl, i mézir pa an éro…
La lo notèr pa présé po fé donasyon lo térin : li va – avèk konplisité lapareyi zidisièr - fé tréné ; konm sa lo pov vié monmon i mor ; sé pi 4.000 éro po fré donasyon, sé 10 foi plis, 50 pour sa n la valèr ; si i kout 100.000 éro, notèr la kab ginye 50.000 éro fré suksésyon !
Ti kroi k la loi lé bon po toul moun ?!

 Justin 


Kanalreunion.com