Oté

I diré banna l’apré fèr anou zinzin, l’apré fèr anou zalou !

Justin / 19 févrié 2014

Mi sort rogard biltin l’informasyon, mi pans dsi rényon-promyèr o sinonsa dsi l’ot shène. Konm dabitid in bonpé zimaz, san bokou zésplikasyon é sirtou san ramèn la késtyon dsi nout problèm La Rényon. La pa in krétikasion mi fé, mé solman in konstatasyon, épi i anpèsh pa nou si ni vé fé travay nout koko fèr nout prop réfléksion, an avoir nout prop l’opinyon. Mi di sa pou kosa ? Pars la amontr in tramway dann Quatar : in drol dé zoli tramway, l’avan tayé konm in dyaman. sèl z’afèr i shoz amoin in pé sé lo troi klass, promyé, dézyèm, troizyèm, pars moin pèrsonèl in sèl klas lé bon pou moin, pou mon mantalité, pou mé z’idé, épi sirtou pars toulmoun lé an parmi.

Astèr anon artourn in pti pé an aryèr. Kan mi di sé pa in l’informasion rényonèz sé pars i mèt sa dann la konkirans rant fransé, z’alman épi d’ot pou oir kisa sar pli for dann la fabrikasyon bann tramway. alsthom kont siemens, siemens kont bonbardyé étsétéri-étsétéra. Sak mi romark sé ké , an pasan, kansréti an pasan i parl pa lo sabotaz nout tram-trin..poitan in l’idé modèrn, in l’idé intérésan pou nou konm pou d’ot, in l’idé ké bann sabotèr nout dévlopman la tyé san tienbo kont nout l’intéré. Konm touzour kan i lèv la tèt isi La Rényon, i fo k’i anfons anou dann lo si la pa dann la tèr, touléka dann fon olèrk mète anou anlèr..

Koman mi rosoi in n’afèr konmsa moin ? La pa ké moin lé pa kontan kan la téknolozi La Frans i amontr son kapab ! La pa ké moin lé pa kontan kan bann travayèr fransé i gingn travay, mé pars shak foi mi romark lo pé d’ka k’i fé avèk nout z’intéré la-ba dann Paris, lo pé d’ka ké gouvèrnman fransé i fé avèk nou. L’èr-la, kan i amontr in siksé la téknolozi fransèz moin na konm l’inprésyon in pé konm i di l’apré fèr anou zinzin, l’apré fèr anou zalou.

Justin


Kanalreunion.com