Oté

I done pa konfitir koshon !

In kozman pou la rout

Justin / 22 octob 2016

Mi kalkil lo moun i di sa, i pans konfitir sé in kékshoz bon pou manzé. Demoun i manz konfitir, mé koshon kosa i manz-boir ? I boir lo sal ! I boir ankor lo gra épi ou lé asiré ké va angrès ali. Mé kosa kozman-la i vé dir ? I vé dir, sanm pou moin, si ou i done konfitir koshon, donk in moun i vo pa lapène, sé in gaspiyaz ou l’apré fèr. Dann lo kozman, sa i vé pa dir lo koshon i mérit pa sa ! Donn ali in manzé koshon si ou i vé, mé pèrd pa in bon n’afèr pars sa la pa in bon manzé koshon. Donn in konfitir koshon sé done in bon n’afèr in moun i mérite pa. Donk sé in pèrt tan ! Donk sé in n’afèr lé initil ! Mi pans zot i konpran amoin. Alé ! Mi pans zot i suiv amoin é mi souète azot in bon zourné sipétadyé.


Kanalreunion.com