Oté

I donn pa lanvi alé !

Justin / 17 mars 2015

I rèt a nou kaziman sink zour ziska dimansh proshin, ziska dimansh 22 pou kontinié alé war domoun pou zéléksyon. I rèt a nou sink zour pou ésplik domoun la lwa de modérnizasyon de laksyon piblik téritorial. Ryink sa, pou modérné, la modérné. Lé télman tro byin modérné, domoun i konpran pi. Sak lé sir, sa in zéléksyon kikilik, déza néna domoun i konpran pa poukoué i ranplas lo konsèy zénéral ké tout i koné son fonksyion zordi, pou ranplass par lasanblé départmantal ké pou désértin lé pa tro klèr.

Zordi lo konsèy zénéral néna in désertin konpétans, la solidarité sosyal lé an parmi, bann colèz osi, aprésa néna osi la politik kiltirèl, la vi asosiativ, lagrikiltir, lo serviss insandi tousala, pou domin, èk lo nouvo lasanblé départmantal, na pwin inn i nyabou di kèl konpétans pou sa ? Lo dékoupaz souvan-dé-fwa an masikrok i konvyin tou zis. Konm lé fé, i mèt domoun dann lanbara iparé, vik shakinn néna son labitid pou voté, doborinn shakinn i dovré vot dan son biro abitièl.

Pou in pé lo biro i shanj, néna minm lo vil i shanj. Dikou lo trwakar d’moun i gnor lo kanton nouvo, in pé i di i donn pa lanvi alé. Mi sort war dan lo sid, néna kandida i réspèk pa tro landrwa pou lafisaz. Fi in tan domoun té afis in pé partou, Zordi la lwa i obliz afisé si pano éléktoral, néna pano prévi pou sa, sak i réspèk pa antansyion lamand. I prétan sé lo préfé ki dwa vèy la d’si. Lé a domandé si Tousa la lé pa fé éxsopré pou dékouraj domoun ? Pou vréman i donn pa lanvi alé !


Kanalreunion.com