Oté

I fo bien éklèrsi lé shoz ! Oir kosa gouvèrnman nana dan l’idé

Justin / 28 novanm 2012

Matant Zélida la ékrir Justin :
Mon shèr nové, mon spès salté,
Mi domann amoin bien pou kosa in pé dmoun i èm fé z’afèr i ansèrv de rien. Sa lé vré pou sak i fé in domann é zot i koné par avans sa i ansèrv rien domandé, pars sé in n’afèr i gingn pa. Sa lé vré galman pou bann moun na poin la fors pou fé pas in n’afèr é i sèy kant mèm. Na in bonpé l’égzanp i vien dan mon tèt kan mi di sa, mé ma pran in sèl l’égzanp : bonis COSPAR. Lo sinkant éro, demoun la gingné pars Sarkozy la doné. Zot i oi bien sa sé in n’afèr k’i gingn ar pa vik Paul Vergès li mèm la domann lo Séna in votaj la-dsi épi bann sénatèr la di non. La arzèt son propozision. Donk, sa i vé dir, lo mouvman té pa bon é té i falé pa rant dann in trin konm sa. Bann zorèy i di, pou zot par, l’avé poin in bon l’oportinité. Tok ! Pran sa pou toi.

Justin la fé pou répons :
Mon vyé matant k’i koz touzour la boush rouvèr,
Dabor, dann in n’afèr, i vo myé konprann lé shoz avan rouvèr son bèk. Pou kosa mi di sa ? Pars la domann Paul Vergès té i port pa dirèktoman dsi la prime COSPAR. Dsi kosa té i port alor ? Paul Vergès l’avé domann gouvèrnman kontinié ankor èd pèy la kotizasion dsi lo bonis COSPAR san pèrd l’arzan. Pou sa, li la propoz mèt in taks dsi sigarèt konm sa pou l’Éta té in l’opérasion san doulèr, é an oplis ké sa, sa té i rant dann program gouvèrnman pou diminié fimé. Komision finans lété dakor, mé gouvèrnman la di, sa i sa done difikilté an plis, é bann batèr tanbour Parti sosialis la suiv gouvèrnman. In batay initil ? Non, sa la pa in batay initil pars i fo gouvèrnman i fini par di si li vé, sansa si li vé pa raz la pint nivo d’vi bann travayèr. Kroi amoin, sa lé pa initil. Pars i fo bien éklèrsi lé shoz. I fo oir kosa gouvèrnman nana dan l’idé. Lo konba i kontinié ! In poin sé tou. Tok ! Pran sa pou ou !

 Justin 


Kanalreunion.com