Oté

I fo dir azot, alé tir in fèy : tan-la la fini sa non ?

Justin / 14 désanm 2016

Matant Zélida la ékrir Justin

Mon shèr nové, mon spès salté, rouj-de-fon dovan l’étèrnité figir aou, mi sort aprann in nouvèl la bien fé plézir amoin pars moin lé sir sa i sava déplézir aou. Kosa i lé ? In pti nouvèl moin la lir dann zinfo té i di konm de koi, bann paran zélèv l’ékol Kamélia dsi la otèr Sin-Lé la fé konm in révolt. Pou kosa d’apré ou ? Pars la diréktris lo l’ékol la désid mète bann klas an kréol san anparl bann paran. L’afèr la shofé d’apré sak i di é mi konpran bien bann paran-la.tok ! Pran s apou toi !

Justin la fé pou répons

Mon vyé matant k’i koz touzour la boush rouvèr, mi toiz aou dé loin é mi konpran bien kosa ou oi vé dir. Donk pou ou, lo bann paran lété pa kont lo kréol dann l’ékol pou z’ot marmaye, mé zot té kont pars sa la fé an misoukant san dir azot arien.

Matant, gard dann in trou don ! vi pans moin la tyé kouyon pou pran son plas ? Vi oi pa lo moun la fé z’ot mouvman zot lé sinploman kont lo kréol dann l’ékol konm lontan, konm dann tan asiz an kasèr brède. Sak zot i di sé pou boush lo zyé d’moun in poin sé tou.

Pars alon kalkil in kou : pou tout matyèr, tout program i fo l’ékol i domann pèrmisyon bann paran ? Pou l’édikasyon séksyèl li ! Pou lo matématik modèrn li ! Pou la lang tamoul li ! La lang shinoi li ! Alé matant so bann moun-la i fo dir azot alé tir in fèye. Tan-la lé fini sa non ? Tok ! Pran sa pou ou !


Kanalreunion.com