Oté

I fo konèt ou nou sort po konèt ou nou sava…

Justin / 2 novanm 2013

Na déza in bout tan moin la fine lir par Roger Théodora listwar la konstriksyon légliz Tampon par lo Pèr Rognard.*
An fèt, not kamarad la rotrouv bann dokiman la Kur Tampon, mé osi lévéshé, in zournal prèsk zour po zour ékri par lo kuré.
E mon papa té i parl a moin Kervégen, in gro proriétèr lo sid. Li navé son prop moné, mé kan ou lir Théodora, ou i konpran koman la politik, larzan, gro blan té i vé komann lo bann pov moun, koman sèrtèn mantalité la resté, mantalité soumisyon, mé osi mantalité dominatèr.
Kan moin té pti, mon plas dan légliz té dobout déryèr poto dèk i rant.
Mé dovan, promyé ranzé lo ban, navé sèrtèn famiy blan ris, sa té i pèy zot plas, té i loué koué, plas rézèrvé, sa i rant pa par ninport kèl port !
Là, lo pli gro fortine i maryé ant zot, larzan i rès an famiy, lo pouvoir osi.
Lo pli pti, sak la port galé dan son sarèt milé, la krèz karyèr, la taiy lo bazalt, la mont sa an lèr lo klosé, a li touzour an ba dan la sosyété.
Moin té wa, kan moin té pti, ki sa i tir son sapo po dir bonzour sak lé an lèr soval. Sa nout rèst lésklavaz La Rényon, té i aranz sèrtèn klas sosyal lès in bon pé dan la mizèr é la dépandans. Po asévé, légliz i ardi : « T’inkièt pa, toué lé mizèr isi ba, mé kan ou sra mor, oua trouv lo paradi ».
Mèm si lo kuré té in égzanp kouraz, ziska dovan tribinal fas a Kervéguen, po li ariv o bout son prozé, lo shantyé la dir 17 tan ant 1907 é 1924 !
I fo konèt ou ni sort po konèt ou ni vé alé !

*Surya éditions

 Justin 


Kanalreunion.com