Oté

I fo marsh dsi lo pié plito ké dsi la tèt, pa tèt an ba, mé bon koté !

Témoignages.re / 2 mai 2013

Matante Zélida la ékrir Justin :

Mon shèr nové, mon spès salté, rouj de fon dovan l’éternité,

Moin lé sir, zordi ankor, zot lé kont mésié Didier, prézidan la Réjion. Poitan, mi pans li lé pa si loin d’zot ké sa. Mon niès Roberta i sort done amoin in rovi, dodan nana in l’intèrviou mésié Didier. Dabor inn, dan lo l’intèrviou, banna i di karéman li lé pou l’otonomi. Li di pa konm sa, mé li di li vé plis l’otonomi dan son rolasion avèk l’Éta, dan son rapor avèk l’Érop épi par rapor bann gran sosiété, konm l’EDF épi d’ot, dan l’intéré lo modèl l’ékonomi rénioné. Pou li, i ansèrv de rien lans bann gran mo pou fé pèr d’moun, alé oir nana dé shoz a fèr pou La Rénion. Momandoné mèm, li bat lo poin dsi la tab épi li di avèk l’Éta : "Lès amoin fèr !", mi vé alé pli vit dan tout késtion dsi l’ékonomi. Li di ankor, li lé pou la koopérasion réjional èk Moris, èk Madégaskar, li lé mèm pou in marshé komin dan la COI. Ala in moun i koz fran, i koz klèr, san rod, konm désèrtin, dékrosh la line avèk lo dan. Tok ! Pran sa pou toi !

Justin la fé pou répons :

Mon vié matant k’i koz touzour la boush rouvèr,

Moin osi moin la antann parl lo l’intèrviou ou l’apré di la. Mé i fo plis ké sa pou moin bat la min pou mésié Didier. Banna i di, li lé pou l’otonomi é li done a konprann sé l’ékonomi k’i kont pou li ; arienk l’ékonomi. Lo modèl ékonomik rénioné ? Mi pans pa li lé pou l’otonomi énèrzétik, in n’afèr li la kasé, mé pou moin, sa i fé parti nout modèl l’ékonomi an akor avèk bann kapitalis nout péi. Li parl pa l’otosifizans alimantèr, mé sa osi sé nout modèl l’ékonomi. Li parl pa l’anvironman, épi lo sosial, mé sa i fé parti nout modèl l’ékonomi. Aprésa, kann lé ménasé disparèt, é li, li di pa arien. Gouvèrnman i di, l’indèx koréksion bann fonksionèr lé ilégal, é li, li gnor sa aparaman. Li pas son tan a vant bann patron é li fé konm si lo politik i kont pou la po d’patat. Sé kant mèm lo politik dann tan Paul Vergès ké la trouv bann z’idé lo pli valab pou konstrui nout l’avnir. Sak lé pa dakor èk sa, li tourn lo do avèk la vérité.

M’a dir aou matant kèl l’imaz i vien dan mon l’éspri kan mi lir l’intèrviou mésié Didier, sé sèt in moun i marsh dsi la tèt plito ké dsi son pié. Donk li marsh tèt an ba é li vé La Rénion i marsh galman tèt an ba. Tok ! Pran sa pou ou !

 Justin 


Kanalreunion.com