Oté

I fo pa sa sé in déba pou la po d’patat !

Justin / 6 févrié 2015

Zéléksyon départmantal i ariv san tro tardé. In pé I souplègn I fé in zéléksyon é aprésa va vid lo pla lo l’asanblé. Sar konm k’i dire in goni vid, sansa in sinp kok vid. Na in pé zot program lé sinploman kalé dsi sèt parti sosyalis. Na in pé lé kandida pars pou zot sé konm in lokzyon fé konète zot nom.

Tousala sré pa grav si La Rényon lété pa dann lo ka ké ni koné. Mi koné pa si i fo parl lo sète boubou konm té i anparl pou l’egip dann tan lontan. Sak na in pé linstriksyon rolizyèz, mi pans i doi konète sa. Donk mi koné pa si nana vréman sète boubou, sansa si na plis, ou bien moins. ni koné lo shomaj, ni koné la mizèr in bonpé d’moun, ni koné l’ilétrism, ni koné la kriz nout prodiksyon, ni koné ankor la vyolans, ni koné demoun anmaré avèk lalkol é pi désèrtènn maladi, ni koné ankor lo l’informasyon étoufé, ni koné bann z’APE, la mondyalizasyon, la kriz dann kann… sa i fé déza pliské sète.

Na poinn sizé lé an déor d’sizé si i konsèrn nout pèp rényoné é ki doi z’ète évité dann in sobatkoz. Na poinn sizé i fo pa anparlé. Nout problèm sé problèm La Rényon é problèm La Rényon i fo ni koz dé sa toultan é ni propoz bann solisyon. Sirtou i fo pa zéléksyon i ariv sé l’okazyon fèr in déba, sinploman, pou la po d’patat.

Krapo i gard aou, la pa bézoin gard ali gro zyé-in kozman pou la rout


Sa in drol zistoir é mi poz amoin késtyon dosi. Dabor inn, krapo i gard aou pou vréman sansa li gard ninport de koué ? Sa ni koné pa. Pétète li lé sinploman apré vèy moush pou li gobé. Touléka lé sir, rogard ali gro zyé sa i ansèrv de riyin. Solman, sa i fé pans amoin in rogar i pé z’ète danzéré : na d’moun la gingn lo kou pou sa ! Na in pé la gingn la mor. Donk in rogar i pé ète initil, mèm danzéré pars lo zyé lé kapab lans kalité mésaz mal interprété... Mi koné pa si zot i pans konm moin ! Mi koné mèm pa si kozman-la i di azot in n’afèr. Poitan, fé travay zot koko ! Fé bouy zot matyèr griz ! Zot va oir si rant-rant ni pé pa z’ète dakor rantre nou.


Kanalreunion.com