Oté

I fo pa zèt lo pti baba avèk lo kivète !

Justin / 20 novembre 2013

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,

Mi sort aprann in nouvèl, moin lé sir, i sava pa kontant azot pli k’i an fo. Ou i dovine pa in pé kosa i lé ? Ou i done out lang lo shat ? Bin, ala ! Mésyé Lurel, gran doktèr dovan l’éternel, la fé in déklarasyon konm de koi, si bann Rényoné lé rézonab, zot i doi zèt paré pou rash tout pyé kann pars, sanm pou li, kann na pi l’avnir dan La Rényon. Mi pans sa i doi pa fé plézir azot... vik dopi lontan zot i pran la défans plantasyon kann, nout l’or vèr d’apré zot.

Pou kosa mi di sa ? Kisa la parti débat dann listoir Kartyé Fransé si la pa Paul Vergès ? Kisa ankor lété kont protokol Virapoullé si la pa Parti kominis ? Arzout èk sa, dopi dé tan é dé tan, kisa i pas son tan pou dir kann sé l’avnir dé l’om dann péi Bourbon ? Bin, ala k’in gosh konm zot, pa rouj, mé rozé, i krash dann pla épi i di i fo arèt èk sa... Romark bien, si na pi kann, i pé kant mèm konsèrv in karo pou mèt dann in fitir MCUR pars sa osi i fé parti zot rèv inasové, konm i di dann fonnkèr fransé. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Mi antan bien sak ou i di, mé mi pans la pa Mésyé Lurel i doi désid pou nou Rényoné sak ni doi fé pou nout l’avnir. Sé anou bien rogard nout l’avnir, é pou moin, konm pou in bonpé Rényoné, kann i fé parti nout l’avnir, konm i fé parti d’nout prézan épi dé nout pasé. La pa pou aryin k’i sort fabrik in nouvo varyété kann, si mi tronp pa i apèl R-586 — R konm rényoné ! — pou pous dan lé o, é pou pous l’androi na poin tro l’imidité, san fé l’irigasyon. Myé k’sa, moin la bien antann l’apèl Paul Vergès kan li invit tout Rényoné pou travay ansanm pou tir nout péi dann fénoir… bann Rényoné dann shomaj épi dann dézèspoir... moin la fine di é rodi tout sak i nyabou fé avèk kann. Pou kosa ? Pars kann sé in bon kiltir pou tyinbo nout tèr, pou nout klima, pou nout l’anvironman. Kann pa aryink pou lo sik, mé galman pou l’énèrji, pou nout karbiran vèr, konm baz pou dévlop nout shimi. M’arèt là, mé na pou dir d’si sak kann i pé ansèrvir... Lé vré, si ni mèt nout déstin dan la min bann moun tranjé konm Téréos, é konm d’ot ankor, nou lé sir ni pas in la otour d’nout kolé. Nou lé sir nou mèm i anmar in min dan nout do, sansa ni tir in bal fizy dan nout pyé. Mé la pa sa ké ni vé pou La Rényon ! Ni vé kant mèm dévlop nout péi ! Si sé sa, i fo pa ni rash nout kann. Konm bann moun déor i di. I zèt pa lo pti baba avèk lo lo d’kivèt sava. Tok ! Pran sa pou ou !

Justin


Kanalreunion.com