Oté

I fo vèy sa konm lé dsi l’fé !

Justin / 21 octobre 2010

L’èr ni réspir sa in mélanz plizyèr kalité lo gaz. Nana l’azote, l’oksizène, in bann gaz rar an pti kantité… é nana ossi gaz karbonik. Oplis nana gaz karbonik dann l’èr, oplis l’èr ni réspir la pa in l’èr bon kalité. Lé pa bon pou sak nana l’oprésyon, sansa pou sak lé riskab gingn in kardyak.

Sharbon, lésans, gazoil, lo gaz... lé résponsab
Lé vré l’èr ni réspir koméla, la pa in l’èr tro mové kalité, mé d’apré sak moin la tandi dir, la kantité gaz karbonik i komans in pé tro goumanté. Ousa sa i sorte ? Dann bann l’izine éléktrik Bois Rouge épi lo Gol épi dann bann transpor kisoi lo kar, kamiyon, loto, moto.

In l’èr pli méyèr pou réspiré
Si i gingn diminyé so gaz-la, nout l’èr sar pli méyèr pou réspiré. La Rèjyon, dann tan Paul Vergès lété prézidan la déside goumant l’oktroi d’mèr déssi lo sharbon d’tèr pou diminyé la kantité va fé vni épi la déside pous déssi pou dévlop bann lénèrji prop. Sa lé bon sa pou nou !

Na in pé i s’anfou dsa
Lé vré na in pé i kass pa la tète pou sa. La prèv zot i vé fé roul lo kar avèk GPL. GPL ? Sa pétrol sa, é li larg gaz karbonik dann l’èr. Lé pa bon pou nout santé. Pétète nout santé i kont pa ! Donk i fé aryin si i anpoizone anou dousman-dousman. I fo ni vèy sa konm lé dsi l’fé.

Justin


Kanalreunion.com