Oté

I fo zamé fé zordi, sak i pé ète fé domin !

Justin / 11 out 2014

Mi sort lir, na in n’éstan, lo niméro éspésyal zournal Témoignages. Mi éspèr, zot osi zot va lir ali, konm la plipar d’moun i intérès azot lo déstin nout péi. Na san mil zournal konmsa va sirkil min an min épi va donn l’okazion lir sak nout parti i anpans dsi nout sityasion koméla. Mi éspèr demoun va réfléshi épi va kalkil kèl tizane lé bon pou aranz in pé nout ka, é pétète trouv in bon solisyon pou in bon bout tan. Mi pans, l’antouraz lo prézidan va diskit dsi sak nout parti i di é dsi lo bann danzé i ménas nout péi dann pa lontan.

Pou kosa na danzé ? Pars la zamé désid trouv la solision k’i fo pou nout bann problèm. Sak i lir Témoignages i koné nout bann problèm, é sa la pa ariv d’in kou… L’ariv o fir-a-mézir é pèrsone la pa sousyé trouv lo bon tik-tak. Kan mi di pèrsone, mi vé pa dir bann ti-kolon, ni bann z’asosyasion, ni lo rényoné an zénéral si li lé in pé informé, mi vé dir bann gouvèrnman gosh konm droit sak la gouvèrn la Frans dopi in kantité d’zané. É la zamé pran nout problèm o sèryé. La touzour ésèy aplik bann pti solisyon, konm té i di dann l’ansien réjime la royoté, bann zéspédian- sa i règ pa l’afèr, mé sa i ropous ali pli loin. Poitan na zélu rényoné é défoi désèrtin i oi bien klèr dann nout sityasion, mé lo bann gouvèrnman la pa arète pinn azot, fé prann azot po do d’shanm pou pla kouvèr, la pa arète diviz azot rantre zot é mi pans zot téi trouv zot kont, zot l’antouraj galman pars sé in bann privilèj.

An atandan, kabri i manj salad, é lo bann problèm tanpir k’i sava, tanpir k’i agrav.I romète a domin, touzour romète a domin é nout ka i vien plizanpli grav. Talèr va di na poinn solisyon pars la fine ésèy tout é arien i marsh pa. Sof ké solisyion nana é nout parti kominis i arète pa propozé mé la touzour profèr bann zéspédian suivan in règ mi souvien in vyé profésèr té i di anou kan nou té in pé néglizan : i fo zamé fé lo zour mèm, sak i pé romète a domin..épi tazantan té i mète anou in bèl zéro dsi nout karné…

Justin

NB Zot i koné lo kozman "an atandan kabri i manj salad". Ousa sa i sort sa ? In moun la di amoin, si ou i anmar pa out kabri konm k’i fo, sansa si ou i mète pa li dann in bon park ; li rant dann out zardin é li manz sak lé méyèr, sak lé pli tann a komansé par lo karo salad. Mi koné pa si sé sa, pétète zot na in méyèr ésplikasion ?


Kanalreunion.com