Oté

I koz pa la boush plin !

J.B. / 11 avril 2015

Sirtou, zinn pa ou dann la mèr bèl gramoun i di. Mwin néna souvnans so kozman la. Kan la mèr lé bèl, profit pou alé la pèsh, pou fé bék pwason, profit pou kass kokiy, pou binyé tousala. Néna i atann pa solman kan la mèr lé bèl pou profité minm kan la mèr i kass zot i profit minm. Boudikont profitèr, profitèr touzour. Mi sort lir dann in zournal in patron lantropriz la ba déor, son bwat néna gro difikilté, mé li la pa mank ansèrv a li avan pran lo larz èk trwa million larzan. Poitan la, la mèr té pa bèl mé li la pa zinn a li kan minm.

Isi shé nou, zot i koné kosa la kour dé kont la ékri si l’IRT si gaspiyaz larzan touzour ? Mi rapèl a zot sé koué l’IRT. Sé lo mashin ki okip lo tourism isi la rényon. I prétan banna i zoué dan la mèr bèl osi la ba. Kisa la di néna lostérité ? Kisa té dann shomin tèr la pou manifésté kont lostérité ? Sak lé sir sék pou désértin la vi lé dir, sak i atann lo sink di mwa, sak i atan la pos rouvèr gran matin pou tir in moné. Pou zot la vi lé dir vik zot i rèt lwin la mèr. Pou zot, oki kokiy, oki bérnik, oki moul, oki birgo…

La ba la rézyon rényon touzour, néna in madam ki manié byin larzan osi i prétan. Pou kimilé èl i kimil i di. Trwa, kat, sink, sis i kont pi lo nonm prézidans li okip, prézidant isi, prézidant la ba, délégé lot koté é tousala èk larzan ki ariv avèk. Dan lo lasanblé banna la poz a èl in takon késtyon si son kimil, i prétan èl navé difikilté pou réponn. Mi pé konprann a èl, koman ti vé, minm si èl la anvi réponn, èl i pé pa ? I koz pa la boush plin !


Kanalreunion.com