Oté

I mank pa lokazyon, in pti plézir d’ suif lo ki in néo-kolonizé !

Justin / 4 zwin 2016

Konm i ariv samdi mi sa fé-sak mi fé pa d’abitid-in pti rovi d’la press :

Dopi dé troi zour la plui i donn paké la-ba dan La Frans : i tonm pa pou zoué d’apré sak ou i oi dann télé ; dé sèrtènn plas i évakyé demoub par milyé pangar i noiye azot. Mèm la sène la gonflé dann la kapital Paris : la pa gonf konm l’ané 1910 mé la gonf kant mèm in bonpé. Lo zouav lo pon l’alma, la du gingn rofroidisman ; romark i tonm bien pars na poin tro lontan tout bann sèrvis la fé inn répétisyon zénéral pou lo ka, si li prézant.

Konm nou la parl la plui, alon parl in pé solèy : figir azot i l’injényèr la invant in n’afèr réspé : in blaké k’i ramas l’énèrzi lo solèy épi k’i rann sa o fé noir. Si tèlman ké la rout i éklèr é la pa bézoin gaspiy kouran pou klèr ali dann fé noir. Kan ou i aprann in nouvèl konmsa ou i rann aou kont ké Paul Vergès l’avé bien rézon kont dsi lo solèr pou mète ansanm son miks énèrzétik é trap l’otonomi énèrzétik. Li lé bien pli klèr voiyan k’inn-dé déméré k’i diriz nou zordi.

An parlann déméré, Didier Robert l prézant lo méga-barj pou transport galé. Madam Bello i kass ali ti-boi ; lé normal. Moin mèm mi pans n’arté méyèr fé l’inogirasyon d’in trin plito k’in barj. Mé madam Bello lé mal plasé pou krétiké : èl mèm èl té pa pou arète avèk la NRL l’ané 2015. Arzout èk sa l’ané 2010 èl la mète son poi dann la bataye pou fé pèrd Paul Vergès : mi pans èl i rapèl de sa. Sirtou k’èl nana in bon mémoir. Didier Robert osi, ké l’avé di l’erop i partisip la NRL mé l’erop i sort anvoye son bann z’ankétèr pars èl i èm pa k’i fé pran aèl po d’shanm pou pla kouvèr.

An parlan d’sa, la zistis osi i èm pa lo trikmardaz. La prèv troi gran zélu, madam Dindar dann ta i sort gingn i bon kondanasyon an promyèr instans. Fé pa la bou avan la plui pars na ankor lo tan avan k’i oi la foin dann sète afèr : i pé an avoir lo rapèl, lo kasasyon, pétète la zistris l’erop galman. Dan touléka na in n’afèr mi romark : bann ziz-la, si i donn azot l’okazyon, zot i dédègn pa lo pti plé zir dé kondane bann nèo-kolonizé. Zot i pran plézir pou suif lo ki lo bann z’élu mé galman néo-kolonizé. Koman Georges Brassens té i di sa ? Kan zé pans a Fernande…


Kanalreunion.com