Oté

I mèt ti poul èk ti poul é ti kanar èk ti kanar !

Justin / 5 mars 2015

Lotrozour mwin la anparl a zot lamannman Bareigts, la dépité sosialis sinn-ni, si son lamannman apropo zour féryé dan loutromèr, an gro li vé galizé par lo ba, li vé rotir in pé bann katolik pou rodistribié èk dot, sépousa mwin lavé di, momandoné li lé télman générèz kèl i fé konm limoris ki di « donn a mwin out mont ma donn a ou lèr ». Dann son konférans do près lindi dérnié lo sénatèr Paul Vérgès i rovyin la d’si é li di pou rézon « poukoué dék ni gingn inn ti konstipasyon sanm zanblon èk gouyav ni kour rod Zanbavil Paris ? Poukoué a shak éstan ni sar ansouplingn a nou la ba ?

Pétèt in roflèsk ? in roflèsk la gouyav do frans ? Paul Vérgès i di « a koz la pa tash manièr règ so problinm la rantronou plito kour paris pou propoz in lwa, vik sé in problinm de loutromèr solman ». Aforss, aforss voulwar rosanm la frans, na détinn. Ala dikou la mèt safran dann brèd mourong, la fé la kouyonad. Sanm pou mwin konm èl i nyabou pa fé in nafèr sontousèl, èl la mèt son lamannman dann la soubik Makron, sépousa pou vréman banna i apèl la lwa Makron, la lwa four-tou. Ala la prèv.

Dikou lo prézidan té oblizé réponn la d’si, vik lo nafèr lé bankal. Mérkrodi dovan in bann léktèr in zournal, inn la poz a li in késtyon « koué lamannman Bareigts i fé èk lo prozé dlwa makron ? Pou mié pinn a nou an misouk pétèt ? Inn sé in prozé dlwa si laktivité, la krwasans èk lanplwa é lot sé in lamannman si la rolizyon. Oté madam la dépité, i mèt pa ti kanar èk ti poul, i mèt ti poul èk ti poul, é ti kanar èk ti kanar, sé sak lo prézidan li minm i di.


Kanalreunion.com