Oté

« I nouri pa l vèr pou pik son kèr ! » - in kozman pou la rout

Justin / 1 avril 2015

Dann tan lontan demoun téi mor avèk la maladi lo vèr. Té i prétan, lo vèr téi mont o kèr é té i pik ali. Lé pa konmsa, mé bann vèr kan zot i atak dann l’intestin zot i done la maladi é mèm la konplikasyonn maladi é san médikaman l’avé d’moun té i mor…

Dann nout kozman pou la rout sa i vé dir, ou i évite nouri lo mal lé riskab fé aou d’tor. Donk, ni évite kré in sityasion lériskab fé anou d’tor in zour.

In légzanp ? In moun volèr, ou i done pa li in plas pou li dor dann out magazin, pars landomin li la fine déménaz out bien. Zot pèrsonèl, zot la fine trouv in sityasion konmsa ? Kalkil bien, fé bouy zot matyèr griz é zot va oir, si rant-rant, nou lé pa riskab ète dakor rantre nou.


Kanalreunion.com