Oté

I paré TAK la détaké !!

Justin / 19 zwiyé 2014

Zot i rapèl lo mo Thierry Jardinot : « kan TAK atak... » mi souvien pu la suit.
Zordu mon modékri va rosanm potin par si potin par la ; la di la fé si zot i vé.
Sa i jinn pa moin, pars isi dan nout ti péi, nou i inm pas nout zidé oralman ; nou amiz a nou ; inn i di in nafèr ; i ar sar répèt sa pli loin ; nout kiltir popilèr lé konm sa ; a moin personèlman, ék tout bann zilétré na ankor la Rénion, rèzman nankor lo pasaz oral, mi aprouv sanpoursan, tan ki atak pa la pèrson an mésansté !

Iér moin ta po fini déménaz sak nout parti la prèt nout kandida promié tour minisipal ; navé ankor in biro po sarz dan mon kok loto.
Moin té fine antann ke jandarm la anpès lo mèr Tanpon pas bildozèr dann fon la Point ; li na in prozé kontourn la vil par lès, kan ou sort sinpièr po alé plinn dé kaf.
Bin, ièr la, na in dalon lariv la-li la vi la limièr dann permanans kanpagn- i di a nou : « zot i koné ke TAK la détaké ! Zot i koné koué i vé dir TAK la détaké ? »
Li ar di a nou, sé bann sosialis la fé in mouvman la popilasion té i sar pèrd 6 mèt térin po fé lo dégazman, mé nou konpran pa touzour sé koué lo « TAK la détaké ».

Kouyon, sa i é, Didier Robert é TAK la trouv in antant, TAK lavé touzour réklamé son 100 milion prézidan la Rézion i doi la komine, po in tad zafèr (Mézon du Volkan, Rokad sinpier-sinbénwa...).
Li la pa giny 100, mé li la giny 50 ; ouè, TAK la giny amadoué not bo jeune homme lo palé ranversé.
Lo dalon i kroiz son dé doi ; na pi dispit ant tou lé dé ; avan, té také ; asteur, lé rouvèr konm in sérur.
Oué, Tak la détaké !

Justin


Kanalreunion.com