Oté

I pé pa an avoir dé mètr an mèm tan : Lo pèp épi larzan, l’intéré zénéral épi lo bizness !

Justin / 19 zwiyé 2010

Mi koné pa si zot la antann konm moin, a s’ki paré, déssèrtin nana konm dan l’idé tourn in fime sinéma déssi "la saga" Bettancourt. Anfin sak in pé i apèl lo fèyton l’été boréal. Pars, lé si tèlman konpliké, nana si tèlman in mayaz rant la politik, la finans, épi d’ote shoz ankor ké lé zis bon pou tourn in fime. Par kont, i mank in pé d’sèx la-dan... A moins k’afors fouiyé, va trouv sa ossi.
Pou moin, nana in n’afèr i plé pa moin ditou sé kan i anparl bann politik la droite té i fé la ké dovan la porte lo milyardèr, té i domann randé-vou pou an avoir in bon moné pou finans z’ot kanpagn… épi pou z’ot posh. Toultan k’té i koz, toultan k’té i fé ladi-lafé, té bon. Zis ou té i pé dir, nana d’moun la tète i travay in pé tro, nana tro l’imazinasyon. Mé kan sa lé étalé dann zournal, kan ou lé sir sa la éspass konmsa, kan nana la prèv bann z’afèr konmsa, ou lé blizé domandé kissa i gouvèrn lo péi, si sé bann politik zot mèm, sansa si sé bann gro vaza kapitalis. L’intéré zénéral, konm i di, sansa l’intéré bann kapitalis ?
Dan la rolizyon i di, k’i pé pa sèrv dé mètr an mèm tan : Bondyé épi larzan. In bon moralité politik i pé pa an avoir dé mètr an mèm tan, lo pèp épi larzan, l’intéré zénéral épi lo biznèss.


Justin


Kanalreunion.com