Oté

I Pinn la ziraf ziskatan

Justin / 14 octob 2014

Sanm pou mwin gouvérnman la, finn larg lo kor.I bouz ankor sa ? Dé kinn i bat lo pié a tèr, ninport kissa, zot i kour.I fann konm ti poul.I gingn la tranblad. La pwin zargo. Pa bozwin alé lwin ? la mèm, rogard z’afèr taks kamyon bérlié la ba déor, bann shofèr i provwin zis, domin ni boush shomin, ni fé baraz, la pwin lo tan di, alala lo minis i fé uit-nèf, i gingn la koulant « Souplé arèt, odrémié, ni bat arièr, ni rokil dérièr, si pou kass tout ni arèt la mèm, bouz pa ». Sa inn. In ot ankor i fé di a mwin banna lé in pé bokou kapon-kapon si lé bor. Bann profésyon libéral, doktèr, lisié, sinonsa notèr, farmasyin, dék bana i pèt in kou for ébin i fé siklonn pou bann minis. I gingn kapkap. Sa dé. Rogard osi zinpo foutbalèr, zot i an souvwin, la di sak i gingn in gro, gro paké, pa sak i gingn inn ti moné zako, sak i gingn milyon, va pèy plis. Mwin té dakor èk zot, té in bon zafèr, sa té dos sa, sak i gingn bon pé, i pèy bon pé. Ousasa. Zis inn ti néstan la di sa. Sa trwa. Foutbalèr i an souplingn, zot dir, mwin na doutans la d’si mé la zordi, promié minis i arèt tout toudinkou.

Zistoman, i parl foutbalèr, fé mazinn a mwin lo vié tan, kan nou té marmay, pou zoué foutbal, nou té kass in kan rant nou.I partaz lo bann. Aou èk mwin, aou èk zazo, ti kok èk mwin, bénwa èk zazo, ti lik èk mwin, pol èk zazo, karlo èk mwin, frédo èk zazo… Konmsa ziskatan finn fé dé lékip i partaz tout égal-égal. Trouv in boul, kiswa boul shifon, kiswa boul papié, sinonsa in vavang, dé fwa in panplémouss, boul karoutchou osi, si ti noèl la pasé. La i zoué. Lavé in tik-tak rantronou, lo lékip pli for té i zoué la pass bwin, té i konstri lo zé boudikont. Lot té pli fày, té kass lo zé, té zoué bobok pou gingn lo tan, té zoué la mont, té larg lo kor findkont.

Pou kosa mi rakont a zot sa zordi ? Zot i pé di, sa in vié fim i san lo rans. Nonva, lé in pé konm zafèr gouvernman an plass. Sanm pou mwin banna osi i zoué bobok èk nou. La pi mwayin mwayéné, i pé pi avans ni dovan ni dérièr é bin i zoué bobok. La promèt tankipé é bin zordi l’èr larivé pou rann kont, pou réloké é la dikou na pwin ryin, lé konm in shyin dann larozwar. Fond mwin mèm mi di, pou trinn a nou ziska 2017, banna osi i sar pouss-pousé, i sar ral-ralé i sar zoué ryink bobok, sinonsa i pinn la ziraf ziskatan.


Kanalreunion.com