Oté

I pointe, i pointe ankor, la nuite konm la zourné !

Justin / 8 septembre 2010

Matante Zélida la ékrir Justin :
Mon shèr nové, mon spès salté,
M’a dir a vou, fransh vérité, mi ariv pa konprann sak zot, bann rouj-de-fon, l’apré di partou. Zot i di konmsa, Didier lé résponsab si nana in takon d’moun dann shomaj. Zot i di li l’arète bann shantyé lété paré pou dékolé. Mé, dann fon zot kèr, zot i koné sa lé pa vré. Dann fonn zot kèr, zot i koné sé d’la mantri. Zot zyé, zot zorèy, koman lé boushé don ? Si lété pa boushé, zot noré vi dann zournal épi dann télé. Zot noré tandi dann radyo koman Konsèy réjyonal i rolans lékonomi. Mi pans sé plito pars li fé d’shoz ke zot lé anvyeu d’li. Si sé sa, é bin ! La pankor fini ! Tok, pran sa pou toi !

Justin la fé pou répons :
Mon vyé matante k’i koz touzour la boush rouvèr,
Vi koné lo patoi k’i di konmsa : « Rozoir vide i fé bonpé dézord ! ». Vi koné sa ? É bin ! Sé sak out Didier l’apré fé dépi k’li la rant prézidan la Réjyon, sak li té i fé kan li lété mèr Tampon. Li koz, li anons, li fé pass son propagann dann zournal, dann télé, déssi bann pano dann shomin, mé bou di kont, sa i done pa gran shoz. La fine lisansyé plis dis mil travayèr dann batiman. Lo nonm shomèr i monte zour-an-zour, é lé pa paré pou arété. Zordi nou lé moi d’séktanm 2010 : shantyé tram-train nora té fine démaré, shantyé la route litoral té i sava komansé, la rokade Tampon nora été près fini. La Rényon nora té fine lèv travay ? Olèrk sa, i pointe, i pointe, i pointe ankor pol-anploi, la nuite konm la zourné.

*Dèrnyèr krak la Réjyon : la fine mète troi san vint uit milyon dann lékonomi. An troi zan, i sar mète troi milyar. Aryink sa ! La pintir i vann pa shèr.

Justin


Kanalreunion.com