Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

I rosanm pétète la vérité, na pétète l’odèr é la savèr, mé la pa la vérité pou d’bon !

lindi 14 octob 2013, sanm Justin

Somenn dèrnyèr moin la gard in lémisyon dsi Rényon promyèr. L’avé inn-dé kador la politik, épi linformasion lokal konm i di sa. An parmi l’avé mésyé Victoria, l’avé osi mésyé Virapoullé, épi Jean-Jacques Vlody. Shakinn la sort son kouplé konm dabitid é moin pèrsonèl moin té apré di, dann mon kèr, si nout péi i kont dsi lo zidé bann moun konmsa, li lé pa sové.

Momandoné lo dépité Vlody la sort in kozman dsi nout parti. Ala a popré sak li la di : solon li, nout parti i insis touzour dsi lo"lokal" é afors insis la dsi, li pèrd la konfyans bann Rényoné pars na in takon problèm, pou trouv in solisyon, i fo koz avèk l’Éta, koz avèk l’Orop é mèm pli loin ksa. Zot i koné na dmoun i di dé shoz konmsa é san plis analizé sa i rosanm in pé in vérité, alé oir sé plis in lérèr ou sinonsa in mansonzri... Dabor kan i parl La Rényon, moin mi apèl sa mon péi, é laktyalité rényonèz la pa pou moin laktyalité "lokal" mé laktyalité dann mon péi. Pou in pé sé laktyalité lokal, pou moin pèrsonèl non. Konm moin la di souvan dé foi moin na dé péi, inn sé La Rényon, l’ot sé la Frans é mi kroi pa dann mon kèr inn lé sipèryèr par rapor a l’ot.

Dézyèm zafèr kan i di nout parti i intérès solman lo lokal, sa lé pa vré é ninport ékèl mèr, sansa Konséyé zénéral nout parti i koné bien pou in mèm dosyé é la pa atann Vlody pou amontr azot sa, i fo koz avèk Déparman, sansa la Réjyon, sansa ankor l’Éta, avèk l’Orop. Arzout èk sa kan nout parti avèk Paul Vergès téi parl l’Orop in pé téi pans sa té in éstrapontin pou li alé pass bon tan, é pa plis ké sa... Aprésa d’ot la dékouv l’Orop, mé pa avan nou, apré nou konm d’abitid. Arzout èk sa, kisa la parl an promyé lo réshofman klimatik ? La pa la droit, la pa bann sosyalis. Sanm pou moin zot té mèm pa o kouran kan nout parti té i anparl de sa. É mèm zot té zis bon pou gougnardé... Alor lo kozman mésyé Vlody, i rosanm pétète in vérité, na pétète, konm i di lodèr, la savèr, mé sa la pa la vérité pou d’bon.

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus