Oté

« I roul ron konm la boul karé ! »

In kozman pou la rout

Justin / 14 désanm 2016

Désèrtin i arzout mèm « dsi la tab plate » sansa « dsi la sab mouyé » : i roul ron konm in boul karé dsi la tab plate ! sansa i roul ron konm la boul karé dsi la sab mouyé ! Zot i koné kréol i èm gaskoné, mé pa par li-mèm. Demoun déor i apèl sa l’oto-dérizyon. Donk sé tir foutan dsi li mèm, tir out portré par ou mèm. I paré prézidan l’Amérik i yèm fé in n’afèr konmsa. Nana mèm in soiré éspésyal pou fé sé shoz-la. Nou isi La Rényon ni yèm bien kass lé kui lé z’ot, mé ni yèm pa kan lé z’ot i kass anou lé kui. Nou lé mèm pa trop pti pou rant dann ron pou in n’afèr konmsa. Nou lé paré pou bataye, pou sésoun in moun pou dépotol ali. Poitan i vo pa la pène la plipar d’tan. Mé nou lé konmsa é pa otroman. Alé ! Mi lès azot kass z’ot koko la dsi é ni artrouv pli d’van sipétadyé !