Oté

I shanj pa lo pèp, mé i pé trouv la limyèr dan li !

Justin / 3 zwiyé 2013

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,

Si mi konpran azot, bien arkonstrui, sé dégréné sa ! Si moin la bien vi, oplis ki arkonstrui, oplis demoun i kit azot pou alé dan d’ot parti, sansa pou mète azot par koté. Pou koué sa ? Moin lé sir demoun dan zot parti la fine domandé : kosa l’ariv lo parti ? I diré nana in bonpé kérèl dé l’intéstine. M’a dir aou franshman sak mi pans ! Pou moin, La Rényon la shanjé é zot parti la pa nyabou suiv lo mouvman. Sé dayèr sèské in politolog i di dsi télé ou sinonsa dann radyo. Vi pans pa, mon anfan, banna na rézon ? A moins ké zot i pans lo pèp na tor é zot rézon. Konm in gran om té i di, si lo pèp na tor, bin shanj lo pèp alor ! Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, Sak mi èm avèk ou, sé ké moin lé pa dakor èk ou san pour san.

In légzanp ? Ou i di La Rényon la shanjé ? Dakor, èl la shanjé é nout parti é bann moun i travay la min dan la min sanm li lé in bonpé pou kékshoz dan lo bon shanjman. Lakèl ? La kiltir, la konstriksyon, lédikasyon, léspor tradisyonèl, lidantité é la modèrnizasyon. La dignité d’moun, léfasaz lo rasism. Ou i koné, tousala lé inportan pou nout parti.

Dézyèm zafèr, sanm pou ou, ni rann pa nou kont lo pèp la shanjé ? Biensir ni rann anou kont. Mé na dé shoz ni vé pa. Lakèl ? Boush lo zyé d’moun par rapor la vérité, di azot tou va tré bien, alé oir lé shoz soi lé frazil dan lo rézilta, soi lé riskab kapoté. Mi pans nou la zamé vouli dir d’moun in pansman dsi in janm do boi, sa sé in bon n’afèr. Vi voi ou mèm léfé sa i pé fèr ! In légzanp ? Dir bann Rényoné, bann kontra l’avnir va règ problèm la zénès, alé oir lé pa vré. Sa ni di ar pa ! In ot légzanp ? Dir demoun, si i shanj pa lé shoz, konm la gouvèrnans… an profondèr… èk in vré pouvoir rényoné, domin va raz gratuit. Ni pé pa di sa, pars lé pa vré... Pétète ou i pans nout program lé pa bon é demoun i vé pa d’sa ? Mé matant, ou i vé, ou i vé pa, la vérité i fini par montr son figuir, alé oir lo mansonj la pate lé kourt… pa zordi, pa domin, li fé trap ali.

Pou finir, mon vyé matant, i shanj pa lo pèp, mé i pé é i fo trouv la limyèr dan li. La limyèr lé la, i fo solman bien rode ali. Rodé pou trouvé, pa rodé pou fé sanblan. Tok ! Pran sa pou ou !

Justin


Kanalreunion.com