Oté

I tard pa, avèk la bagas, Moris va produi son bio-étanol !

Justin / 27 out 2013

Na in patoi i di konm sa : « Kan ou na poin pétrol, i fo ou nana la mazinasyon ! ». Kosa sa i vé dir ? I vé dir, zordi pétrol i amèn lo dévlopman, la rishès épi la modèrnizasyon lo péi. Mé si ou na poin ? Out déstin sé d’èt dépandan, dépans out l’arzan, gaspiy ali. In l’égzanp ? La Rényon, shak ané, i dépans plis sis-an milyon l’éro pou ashté bann produi pétrolyé. In manyèr pou nou an avoir posh plat épi polyé nout natir.

Romark bien, la Réjyon avèk Paul Vergès l’avé trouv in bon solisyon. Sa i apèl l’otonomi énèrjétik. Kosa i lé sa ? Sinploman, ranplas firamézir bann produi pétrolyé par bann z’énèrzi dirab... Sak solèy, lo van, la mèr, la byomas, volkan i pé aport pou nou. La pa in plézantri, pars tousala i fé déza dan d’ot péi. Arzout èk sa bann kartyé, bann batiman otosifizan dan l’énèrji... Domaz désèrtin apranti-sorsyé, désèrtin moun a la sold bann pétrolyé, épi in sèrtèn sosyété nasyonal i apèl EDF la koup anou an d’sou. Mé tardra viendra, nou sar blizé pas par la. Zour-la, nora bien in pé pou rokonèt lo mérit Parti kominis rényoné, épi son son shèf pandan lontan, nout kamarad Paul Vergès.

La pa tousa, mé pou kosa mi parl de sa ? Dabor pars mi pans nout tout i dovré an avoir l’otonomi énèrzétik konm krédo. Mé la pa solman pou sa. Figir azot, mi sort lir dann in zournal Moris, a konté moi d’séktanm, in sosyété lé an projé produi lo bio-étanol dan l’il Moris. Lo lizine la fine sort dan la tèr é l’afèr lé kaziman fé. I sava produi avèk la bagas 24 milyonn lit bio-étanol pou mélanz an pti kantité avèk l’ésans normal épi pou l’ésportasyon. Donk shakinn i suiv son shomin, mé pou ariv mèm androi, diminyé nout dépans pétrol.

NB : Arzout èk sa, lo bio-étanol, sa i pé mèt osi dann rézèrvoir l’avion pou dépans moin kérozèn é polyé moin.

 Justin 


Kanalreunion.com