Oté

« I tir pa boudin kui dann vant koshon ! »

In kozman pou la rout

Justin / 19 mars 2016

Kisa i ozré dir lo kontrèr ? Avann an avoir boudin kui nana dé shoz é dé shoz pou fèr. Sa i fé pa dann in n’éstan, arienk par in klakmann doi . Mé akoz demoun i di sa ? Sa i vé dir koué o jis ? Sa i vé dir ou i pé touzour révé mé pou gagné lé pa si fasil. Dann désin animé, i tir kou d’fiziy dsi pèrdi é pèrdri roti i tonm di syèl. Mé désin animé, sé désin animé ; sa la pa la vi. Konm boudin kui dann vant koshon la pa konm dan la vi non pli. Ziska zordi o moins ! Domin ni koné pa. Tou lé ka, a l’èr, a la minite moin l’apré fé mon modékri, kozman-la i vé dir, i fo pa prann son dézir pou la réalité é sa sé la sazès mèm. Ni artrouv !


Kanalreunion.com