Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

I tronp in moun in fwa, i tronp pa toulmoun toultan !

mardi 21 avril 2015, sanm Justin

La radio, la télé i anons, dann a popré dé sominm ni sar fèt in lanivérsèr. Trwa zan, trwa zan déza, konm lo tan i kour, konm si té yèr la. Souvyin a zot, nou té vé pi war Sarkosy èk son bann, banna la té pou kas tout é konm la di a nou lo shanjman sé pou zordi. Déza dopi 2012, dopi lo 6 mé 2012 la di a nou lo shanjman sé pou zordi, sé pa pou talèr, sé pa pou domin sé pou toudsuit. Té i tonm byin, konm nou té i vé lo shanjman, nout tout nou la koul hollande dan lirn, sépousa li lé lo prézidan èk plis dé swasant dis pour san, touléka pou nou isi.

Zordi nou lé plis mwatié shomin é mwin na konm lo santiman sé li ki koul a nou, soré in prété pou in randi ? Mi sort argard in lémisyon télé é la li koz, li koz konm in vié disk réyé, mi domann a mwin si néna i ékout ankor. Li koz pa si lésansièl, li koz touzour si lakséswar, li koz dan lo vid boudikont. Dan lo lémisyon èk bann jèn, banna la poz a li késtyon si lo shomaz an frans touzour li réponn atann domin, èk in kantité rotrété la désid ropran shomin travay, i vyinbou pi zwinn lé dé bout i di.

Konbyinn dtan ni dwa atann ? Konbyinn dtan bann rotrété va atann ? Minm si mi krwa pa tro sondaz, dopi lo débi, dopi 2012 li dsann an ba, la i prétan zordi lo prézidan lé a tèr, é o plis li avans o plis li anfons. Li pé pa romonté vik domoun i rogard pi télé, domoun i ékout pi radyo, konm si boudikont domoun lé in pé rézigné. I koz ryink pou fé pass lèr dan la boush don ? Aforss, aforss ramass mantri èk domoun, domoun i krwa pi. Konm in pé i di « i tronp in moun in fwa, i tronp pa toulmoun toultan ».


Inn modékri, inn ti lavi, inn komantèr ?

signaler contenu


Facebook Twitter Linkedin Google plus