Oté

I zinn kisa nout Parti ?

Justin / 22 désanm 2015

Kosa i lé pou dovré lo 20 désanm pou nou la Rényon ? Kosa i roprézant pou vréman lo 20 désanm pou nou ? Kansa lé éné lo promié 20 désanm ? Pou réponn a tousala késtyon Rényon promièr la invit in listoryin lo dimansh 20 désanm zistoman. Oilali-oilala, pou li, listwar lé sinp, li di ziska 1981, nou té i fèt sa an kashièt, an privé dan la kour d’moun, dapré li sé lo prézidan Mittérand ké la rouvèr an gran la port, a li minm la sort nout 20 désanm dann fé nwar.

Kiswa lo listoryin i nyor gravman nout listwar, in gro linkonvényan pou in listoryin, in lipotèz i tyinbo pa sanm pou mwin, kiswa éksopré li donn pa lo bon linformasyon sinploman pou rofé listwar a son manièr. I korshré son boush di konmsa sé lo Parti kominis èk son bann militan ké la sobat pou mèt an lèr lo 20 désanm, vik sé la vérité. I korshré son boush di konm sa, son tousèl lo parti la batay pou lo maloya. Ousa lété lé zot ?

Na pwin aryink lo 20 désanm banna i vé pa arkonèt konm dann nout nafèr a nou, nout kontribisyon a nou dann la konstriksyon nout péi. La komémorasyon labolisyon lésklavaz byin sir, nout mizik èk lo maloya, nout libérté koz kréol. Minm si néna i sèy anbloui a nou. Etonn pa nou si in zour in listoryin i vyin di a nou konm sa nout maloya, sé Zaklinn, lotonomi la Rényon, sé Didié. Foutor i zinn kisa di la vérité, i zinn kisa nout Parti ?


Kanalreunion.com