Oté

Ilétré : kan lo zour la lové, li té dann fénoir konplé !

Justin / 28 octob 2016

Mi an souvien, nana in bon koup de tan, in ga la rakont amoin son rèv. Son rèv ? Son soufrans plito, pars-mèm si zordi li sé in onm fé-li trène déyèr li in n’afèr konm in boulé kondané. Son boulé, li la pa gingn aprann bien lir kan li l’été l’ékol é mèm aprésa. Ilétré i apèl sa ?

Li di amoin, in nuite li la rèv li té konète lir. Promyé foi i ariv ali trap sak l’ékol son dèrnyé marmaye épi li rouv lo bann kayé é-konm la limyèr i klèr ali !-li konpran tout : léktir, matématik, résitasyon, shanté, tout !. Li oi lo bann sign la mètrès la mark an rouz : lo bien, lo trébien, lo vi. Li lé kontan mon fra pars son dèrnyé zanfan i travayeb ien l’ékol. I fo dir son momon i suiv ali in pé kisoi lo soir, kisoi lo gran matin èl i trouv touzour in pti tan pou okip zistoir lékol son zanfan. I fo kroir la métrès osi lé valab é atansyoné avèk sa ! son kontantman na pi d’born, mé sirtou li oi lé shoz par li-mèm.

Tout sak li rogard li konpran. Pé sfèr l’éspri sin la dsann dsi li dan la nuite ? Li sava dann lo vyé kaz son famiy lé ankor dobout épi li rogard bann paz katalog lé kolé dsi la tol bak par anndan. Nana zistoir la gèr : li konpran ! Zistoir l’amour : li konpran ! La piblisité : li sézi ! La vi lé bèl kan ou i koné lir pou vréman. Li domann kosa li sar fé domin : domin sé li ki fé travaye marmaye ! Domin sé li k’i lir bann lète faktèr san amène la boutik shinoiva ! Domin son zournal Témoignaz i rès arpa dann son l’antouraz papyé. Ou lé kominis lé vré, mé kan ou i giong palir, ou i gingn pa.

Mé somèy avèk la mor lé parèy. Son rèv konm tout shoz nana son fin. Apré la nuit nana lo zour. Solèy klèr gran matin mé son rèv li ansouvien. Li ansouvien son rèv mé lé konm évaporé : ala ké li gingn pi lir ! Ala ké lo bann lète épi lo bann shif i sote dovan son zyé konm avan ! Ala ké li oi foto mé kosa i anparl ? Li koné pi.

Ilétré ! Kan lo zour la lévé, li té dann fénoir konplé !


Kanalreunion.com