Oté

In bijou batizé ésklav ? Moun vilin na ankor, moun kouyon na pi !

Justin / 5 mars 2013

Zot i koné, na in pétisyon i sirkil dsi internèt. Kisa la lans pétisyon-la ? An parmi bann pétisyonèr, nana Sonia Rolland, in ansien Miss Frans zordi i tourn dan bann film télé. Pou kosa zot la lans in pétisyon ? Pars in mark bijou éspaniol i baz dsi lésklavaj pou lans in koléksyon bijou. Pou bann pétisyonèr, lésklavaz la pa in produi pou mèt a la mod ; Donk, zot pétisyon i di solman : "Lésklavaz lé pa fashion !" vi k’sé in krime kont l’imanité.

Sé sak banna la fé kan zot la apèl zot bijou "shèn ésklav" sansa "shénèt ésklav", sansa ankor "gourmèt-ésclav". Koman in n’afèr konm sa i pé arivé ? Soi sé konm in provokasyon, in kékshoz bèt é méshan. Soi sak la lans in n’afèr konm sa i koné pa lo mantalité épi la kiltir bann désandan zésklav. Sé pou sa lo CRAN la pa loup ali. Sé pou sa bann moun konm Sonia Rolland la pa loup ali non pli ! I pé di ankor konm sa lé déstiné pou bann madam, tout lé bon pou abès bann fanm, pou trèt azot konm in bann zobjé. Anfin, sak lé sir, sé la prèv in sèryé mové gou...

Konm demoun té pa kontan, la mark bijou la trouv son lésplikasion : li la di konm sa, sé in lérèr dan la tradiksyon pars lo mo esclava i vé dir ésklav, mé i vé dir galman gourmèt, ou sinonsa shène, ou sinonsa shénète. A bon ? Bin alor, akoz ésklav épi shèn, shénèt, sansa gourmèt, sé lo mèm mo dann lang-la ? Sof mon réspé, mé dan lo mond la mod, sa té i dévé z’èt in n’afèr koni, é moin lé sir na in movèz intansyon la dsou. Sa la pa ariv konmsa ! Astèr, lo bijou i apèl solman shèn, shénèt, sansa gourmèt... In lérèr ? Oui, sirman in lérèr vouli. Asé fé prann anou po d’shanm pou pla kouvèr, makaroni pou la bouji ! Konm di lo kont, moun vilin na ankor, mé moun kouyon na pi !". 

 Justin 


Kanalreunion.com