Oté

In bon l’idé, sa i krash pa dsi !

Justin / 23 zwiyé 2009

Sak lé drol, sé k’souvan-dé foi, kan nana gro-plui, delo i koul pi dann nout shé-soi. Kap la déboulé, la kass lo kanal, sansa la ponp alèktrik i marsh pi, sansa pou d’ote rézon ankor... Konm par ébzanp, rézèrvor lété o-sèk, avan k’ la plui i vèrs konm vash-k’i-piss. Lèr-la, i fo antann demoun plégné, plèr dann radyo pars manzé la pankor kui, linz la pankor lavé, marmay lé krouté, étsétéri-étsétéra-la ké lo ra !

Alors, défin mon papa té i di : « Bann de k...! Akoz zot i anpar pa inn-dé résipyan pou an avoir d’lo ? É bon lo anpliss ! Sa in bann la tète lé vide ! ».
Bou-di-kont, li l’avé rézon pars lo la plui, sa i pé dépane anou byin souvan. Arzoute èk sa, li koute pa nou aryin, é provik li la pa koul déssi in fèy-tol-sal, li lé bon pou tout z’izaz. Fransh vérité !

Zistoman, mi sort antann dann radyo, la-ba dann la rézyon Poitou-Sharante, Konsèy rézyonal i sava lans in plan pou roganiz in rézo lo-la-plui. Konmsa, kan bann nape lo-sou-la tèr sar vide, demoun nora k’a ansèrv lo la plui. Pou aroz zardin, pou lav linz, pou lo shass-delo, pou lav-a-tèr...
Zot i kroi pa sa in bon n’afèr, in bon légzanp pou émité, ziska issi shé nou ! Akoz pa ? In bon l’idé, sa i rofiz pa, sa i krash pa d’si.

Justin


Kanalreunion.com