Oté

In bon nouvèl kant mèm pou zordi

Justin / 8 zanvié 2016

Moin la fine anparl azot Monsanto ? Sa sé in gran boite vréman danzéré. Ali mèm la fé bann défolyan bann z’amérikin la ansèrv dann la gèr Vietnam avèk tout lo déga ké nout tout i koné. Ali mèm la fé lo l’ézèrban i apèl rond-up é sa i vann partou é lé si tèlman mové pou la natir ké désèrtin péi la domann i anpèsh vann sa dann komèrs, épi tiliz sa dann bann plantasyon pars i di li lé riskab provok lo kansèr (li sré kansérogène !). Arzout ankor, avèk sa li produi in kantité plant OGM. Donk tout sak lé kont natir lé bon pou li fé son bèr, é tout sak lé natirèl, i fo li konbate.

Solman dé foi nana bon nouvèl i sort in pé dann tout péi. In légzanp ? Dann Costa-Rica gouvèrnman la défann tiliz bann produi Monsanto, konm bann z’inséktisid épi l’angré shimik. Rézilta ? Li fé arienk bann prodiksyon Bio épi lo rannman lé pli for k’avan kan té i anploy bann produi kont natir. La-ba, dann Cuba, tout lo prodiksyon lo frui, avèk légime, koméla lé bio é d’apré sak i di zot i rèv pa rotourn an aryèr.

Ankor in nouvèl : mi sort lir in l’antropriz La Frans i apèl Jadela trouv in manyèr pou fé in lézèrban natirèl i apèl Beloukha avèk konm baz l’uil Kolza : li lé bon pou la natir, li lé bon pou la tèr, bon galman pou bann plantasyon é an pliské sa li kout pa dé mil é dé san sak i pèrmète diminyé lo pri bann z’intran. In bon nouvèl kant mèm pou zordi.


Kanalreunion.com