Oté

In bon nouvèl pou nout otosifizans alimantèr !

Témoignages.re / 17 juin 2013

Moin la lir dann in zournal, dann in péi i apèl Haïti, demoun l’apré fé in révolisyon agrikol… i apèl sa in révolisyon vèrt. Zot i koné, Haïti, sé in péi sou-dévlopé san pour san. Arzout èk sa, bann péi kapitalis la rouine sa vèy pa koman épi bann gouvèrnman té kaziman inkapab tir zot péi dan la mizèr épi dan la grif bann kapitalis. I fo dir osi la tèr lé ravajé par la déstriksyon bann foré.

Donk dann péi-la, nana in bonpé pti propriyétèr é zot térin lé mizing mèm, épi la tèr lé si tèlman fatigé, lo rannman, kisoi an frui, kisoi an légim, lé fay é bann plantèr la poin lo nésésèr pou viv... Ala ké dopi in sèrtin tan, banna la pran labitid fé plantasyon dan bann sèr avèk in plastik i anbar bann réyon UV. Zot la romark lo rannman lé bonpé pli for. In légzanp ? Dan soisant-dis mèt karé sou sèr, i produi in bonpé plis ké dann mil mèt karé an kiltir plin-shan konm i apèl sa. Bann plantèr i antrovoi in pé pli klèr, i gingn in pé myé zot vi.

Pou kosa mi anparl de sa ? Dabor pars mi pans ni pé ète kontan kan i ariv in péi pov in bon nouvèl. Pou kosa ankor ? Pars dann Parti kominis i propoz lotosifizans alimantèr. Donk tout bon nouvèl dan l’agrikiltir, sé bon nouvèl pou nou. Sirtou kan ni koné nana sèt mil éktar la tèr an frish. Zot i pé konpran, si ni nyabou mète so bann zéktar an prodiksyon, ni pé an avoir pou nouri nout popilasyon, pou komèrs avèk d’ot péi, é final de kont, pou trap an solidarité sanm bann péi nout réjyon lotosifisans alimantèr.

NB : San obli bann kiltir indistriyèl konm kann épi d’ot ankor. Dizon, ni pé rèv lagrikiltir i ansèrv konm in baz nout dévlopman ékonomik. Asé pou oir in pé in l’avnir méyèr.

Justin


Kanalreunion.com