Oté

In bon priyèr pou Edmond Albius é sa i doi marshé !

Justin / 8 novanm 2016

Na poin lontan, moin lété la kaz demoun mi èm bien. Shé zot nana in bonpé plant intérésan. An parmi nana bann pyé pitaya. L’èr-la mi domann la pèrsone si son pitaya la pankor fé flèr. El i réponn amoin lo rouz la fé flèr, mé lo blan la pa fé. Si ou i vé fé gonn lo rouz i fo polène lo blan é si ou na poin polène lo blan ébin ou lé kite pou out biskui.

Sé l’èr ké mi domann konbienn tan i pé ramas polène. El i réponn amoin sink zour maksimome dann fréjidèr. Donk sète l’ané dèrnyèr i pé pa ansèrv pou lo komansmann sézon. Apré èl i kalkil for, pou èl mèm. El i di : « Amoins ké i konsèrv dsou vid ! »

L’èr-la moin la pans, dann mon kèr : « Ala déza in l’idé ! », i pé an avoir d’ot épi fini par touv in bon solisyon. Pou fini nout konvèrsasyon, moin la di aèl : « M’a fé in priyèr Edmond Albius pou bann plantèr pitaya, pétète son am va travaye épi li va fé énète lo bon solisyon dann la tète in pti marmaye konm li »-Edmond la invant in tik-tak pou fé gonn flèr vaniy kan li l’avé solman douzan.

El la pète a rir, mé moin pèrsonèl, moin lété sèryé pa si tèlman pou la transmisyon la pansé rant in moun mor dopi in paké lo tan épi in vivan, mé sinploman sèryé pars l’om la fine trouv solisyon pou pa mal dé shoz, akoz pa problèm-la, si nou l’avé in bon l’inivèrsité pou travaye dann bon sans ki konvien anou ? Akoz pa !

Sirtou koméla, avèk tout sak demoun i koné : i paré la konésans, koméla, i miltipliyé par dé tou lé dizan, donk nana pou zoué la-dan , si mi tronp pa.


Kanalreunion.com