« In bon zo i tonm zamé dan la gèl in bon shien »

Mi pans sa in kozman zot i koné bien. Pou kosa ? Pars moin lé sir zot l’avé in zour kisoi in bon gran-pèr, kisoi in bon gran-mèr la prévni azot kan zot la komans frékanté. La di azot konmsa i fo fèr atansion kan ou i frékant in moun. I fo suiv son z’alan é son pasan pou konète in pé bien kèl kalité d’moun i lé. Pars lé vré in kou d’foud sé konm in kou d’foli : ou i oi pi klèr pou vréman é ou i artrouv aou maryé avèk in moun lé pa fé pou ou vréman é ou lé pa fé pou li non pli. Pétète nana in bon zo, pétète nana dé bon zo, pététe nana in bon shien, pétète lé dé shien lé bon, mé si inn i shass pa avèk l’ot sé la ké l’afèr i kol pa lé pa. L’antant vinn-katrèr dsi vinn-kat lé pa fasil ditou : lo gran kalité i vien in pti kalité, lo pti défo i dovien in gro défo. Boudikont, momandoné konm di lo kont, i gate la paye é apré in gran dézord shakinn i artrouv son koté, si la pa pli grav. Alé ! Mi arète tèr-la é ni artrouv pli d’van sipétadyé.