Oté

In drol patakès, In nos pou in ké d’mori ?

Justin / 20 zwiyé 2011

I diré nana in bann dirizan na poin asé problèm. Sansa, koman i pé ésplik lo ralé-pousé zot l’apré fé, an déor d’bann gran problèm zot i doi, an prinsip, trouv in solisyon. La késtyon i port dési lo katorz zilyète ; Kosa l’arivé ? In madam lo parti ékolozis la di, apré lo défilé, èl i rèv in gran défilé pasifik plito k’in défilé solda. L’èr-la, in pé, sirtou bann résponsab la droite, la asiz dési èl. Mésyé Fillon, Promyé minis, la mèm di, lo madam i koné pa bien la kiltir fransèz, sé pou sa èl la di dé shoz konm sak èl la di.

Pou kosa lo boug la di sa ? Pars lo madam nana in doub nasyonalité. El lé Fransèz épi èl lé Norvézyène. Sa sé dé shoz k’i ariv, é la loi i défann pa. Zot i koné, na d’moun lé Fransé épi Morisien an mèm tan. Zot i koné galman, nana d’moun lé Fransé épi Malgash an mèm tan. Donk, la poin d’koi fé in pla èk sa. Solman lo madam la déside prézant zéléksyon prézidan la Répiblik é son parti la vote pou li. L’èr-la, désèrtin moun la droite i trouv sa lé pa normal vi ké zot i vé siprime la doub nasyonalité.

Mé kan ou i kalkil bien : la fète nasyonal avèk défilé militèr, sa dé shoz lé pa parèy. Katorz zilyète, sa la fète nasyonal i romonte dépi 1789, é sirtou dépi 1790, té i apèl sa la fète la fédérasyon, donk la fète l’inité. Mé lo défilé militèr, sa i romonte solman dépi 1880 kan la Frans l’avé in kont pou li règ avèk l’Almagn, par raport l’Alsace-Lorraine. Ni sar pa fé in shapite dési lo rol bann gouvèrnman la fé zoué l’armé dann bann guèr kolonyal. Mi pans sa té i onore pa lo péi. Epizapré, nana la guèr just épi la guèr lé pa just. San konté lo rol bann marshann kanon, in rol pa onorab ditou.

Alor, kan moin la antann lo sobatkoz dési défilé katorz zilyète, dann in promyé tan, moin la pa konprann lo patakès ; moin la mèm pans sa in drol de nos èk in ké d’mori, mé final de kont, sa i poz in bonpé késtyon. Mi lès azot kas zot tète la-dsi !

Justin


Kanalreunion.com