Oté

In gouvernman d’vré sharjèr d’lo patanté !

Justin / 14 séptanm 2010

Mi sort lir in zistoir dann l’almanach Vermot. Sa listoir d’in momon i roprosh son zanfan an avoir kass in bokal konfitir. Lo marmay i di li la zamé vi bokal konfitir-la. Konm son momon i kroi pa li, li armète déssi : « Moin la mèm pa toushé ! ». Konm lo momon na ankor doutans, li di : « Kan moin la poz ali landroi li té i sorte, li lété pa kassé ! Touléka, mi rapèl pi si li lété kassé kan moin la sorte dann la kizine ». Étsétéra, étsétéra, la ké lo ra.

Moin la domandé, san domandé, tout an domandan !
Méssyé Woerth i koné pa méssyé Lemaitre ; Lé vré, li la romète lo boug la Léjyon d’Onèr, mé li la pa domann aryin pou lo boug... Li la domandé, mé konm toute dépité i sign in pé bann lète san kalkilé. Lé vré, kan li la romète lo lète, li la konm vi kat ti-mo marké ansanm in léstylo, mé li ansouvyin pi kossa lété marké. Lé vré, li la mark kat ti-mo, mé sé pou domann lo prézidan fé pou l’myé. Si lo prézidan la déside donn lo boug son kordon, lété pars lo boug té i mérite.

Nou la pa byin lir nout sirkilèr !
Méssyé Eric Besson é méssyé Hortefeux i déklar : lé vré, nou zot ranvoy bann ROM dann zot péi, mé zot la done banna in pti moné. An pliské sa, zot la pa vyole la loi, ni lo bann règloman l’Érop, pars zot noré fé konmsa ansanm-avèk toute demoun dann lilégalité. Donk la pa fé in katapar avèk bann ROM. Mé nana in sirkilèr la parète dann zournal i di lo kontrèr, i mète kaziman lo doi sou l’né bann ROM, é i di bann préfé, fé antansyon pou réspèk zot kota. Poitan, zot la fine alé aporte la démanti so konte-la avèk bann moun la Komissyon éropéene. Koman fèr fas éstèr, mon dyé ségnèr, vi k’in pé i domann k’i kondane gouvèrnman fransé pou sak li la fé. Nou la pa byin lir sak d’ote la ékri pou vréman...

Koman i rokoné in vré Droite ?
Kossa i lé in vré droite ? In vré Droite, pou komansé, sé in vré sharjèr d’lo. É in vré gouvèrnman lo vré Droite alor ? Pé s’fèr, sé in vré gouvèrnman d’vré sharjèr d’lo patanté.

Justin

NB : lo règlomann Justin : avan rakonte inn krak, i fo ou i koné kossa out vizavi i koné déza déssi lo sizé.


Kanalreunion.com