Oté

In gouvèrnman komansa sé in vré malédiksyon !

Justin / 30 out 2011

Lang fransé-la, sa in lang lé bien difisil. Antansyon si ou i konfonn lo mo. In légzanp : la diksyon ansanm l’adiksyon. De boush lé dé lé parèy, mé lé dé i vé pa dir mèm shoz. La diksyon sé out manyèr kozé : par ébzanp kan ou i tourn out boush an déyèr volay pou di "beur"… L’èr-la ou i akomode, i diré mèm ou i sir-akomode, pars si ou i lès out kozman déroulé ou va di "bèr" natirèlman. Défoi, ou i sir-sirakomod kan ou i di "lo linj la fini d’shéssé". L’adiksyon, tan k’a èl, sé kan ou i gingn pi s’anpass in kékshoz : par égzanp, zoué kart pou larzan, sinonsa kan ou i pé pa s’anpass boir lalkol.

Antansyon ! Mon gouvèrnman k’i rode arienk nout bien la déside in n’afèr. Mète in taks déssi bann lalkol k’i provok l’adiksyon. Sé lo ka tout bann lalkol for La Frans i ashté déor konm lo riski épi d’ote ankor. Mé solman mon gouvèrnman la déside, apré an avoir konsilt bann gran doktèr ké na dé kalité lalkol i provok pa l’adiksyon, sé lo vin épi lo ronm. Si mi suiv bien bann tète dé zèf-la, ou i pé, si ou i vé, s’anpass do vin, ou sinonsa s’anpass lo ronm kan ou i déside. Moin l’avé in dalon, toultan li té boir sou, avèk lo ronm, sou lo matin, sou lo onzèr épi sou lo soir, mèm la nui li té i boir pou pa pèrde son l’éfé. Zot i koné, li l’arète boir d’in kou ! Mé sa sé in mové légzanp pars li lé mor in bozour ou pétète ine nuite konm l’ègl noir shanté par défin Barbara..

Mé konm gouvèrnman sé in fizi dé kou... inn i tir pou de-fo, inn i tir pou de-vré... moin lé sir, li atann bann dépité kisoi pou mète la taks déssi tout boisson nana lalkol dédan, kisoi pou siprime lo taks déssi tout boisson lalkolizé. Aprésa, mon prézidan va lèss batay lé z’inn avèk lé z’ot. Li va monte déssi la montagn, avèk son éstati prézidansyèl, pou agard, konm di lo provèrb bann shinoi, lo konba bann tigr dan la plène. Dann tou lé ka, sar pa so fote !... La pa tousa, nou la pankor fini nout lésson vokabilèr fransé. Nou la anparl la diksyon. Nou la anparl l’adiksyon, astèr nou va oir in troizyèm mo é so mo-la, sé la malédiksyon. Pars an avoir in gouvèrnman konmsa, sé in vré malédiksyon pou nou ; Yès Mann !

Justin


Kanalreunion.com