Oté

In gouvèrnman san kèr par lé rish, pou lé rish !

Justin / 25 out 2010

Matante Zélida la ékrir Justin :
Mon shèr nové, mon spès salté,
Ban rouj-de-fon lé for pou krétik nout ti prézidan épi son gouvèrnman, pou toute sak zot i fé, pou toute sak zot i fé pa é ké zot i dovré fèr soi-dizan, pou toute sak la éspass yèr, sak v’arivé zordi, é galman domin. I di mèm gouvèrnman la pa tyinbo son promèss. Lé byin zoli koz konmsa mé kan nana do fé dann in kaz, i fo étinn. Aprésa, i okip lo plantasyon. Mon pti prézidan, la trouv déssi zot shomi in kriz la bank vèy pa koman, téi falé trouv in solisyon. É li la trouvé, vi k’la kriz lé kant mèm in pé déyèr nou. Ké zot i vé, ké zot i vé pa ! Tok, pran sa pou toi !

Justin la fé pou répons :
Mon vyé matante,
Mi èm byin oute kozman déssi la kriz, mé konm d’abitide, moin lé blizé d’romarké ké ou i rézone konm in tanbour. Pou koué ? Pars kan do fé i pran, i komans par tir d’moun dan lo kaz, i étinn do fé, mé bannn zabitan i tash moiyin ossi garanti zot plantasyon. Out ti prézidan la pa fé sa. Li la fé in matrakaz larzan pou sèy arète in pé la kriz la bank, lé vré. Mé li la lèss dégrinn lékonomi, li la lèss lo shomaz filé, é li la lèss bann rish gonf ankor zot pla. Mèm dan la kriz ! Sirtou dan la kriz ! Bann rish la vni pli rish, la majorité d’moun la vni pli pov. Bann for la vni pli for, bann fèb la afayi ankor. Sa in gouvèrnman sé in gouvèrnman san kèr par lé rish, pou lé rish.

Justin


Kanalreunion.com