Oté

In gran sérviss a la pérsonn pou banna !

Justin / 3 févrié 2015

Koméla préské dan tout famy la rényon, mélérozman néna touzour inn ousinonsa défwa dé moun minm lé pa tro gayar, kiswa in pé fay-fay par rapor a laz, kiswa malad minm, télman néna in takon maladi i trinn konméla. Souvan-dé-fwa zot i sobat kont sak ni apèl bann maladi nouvèl i déklansh konm sa sank ni pé éspliké, sank ni konprann, i atak domoun san prévni konm sa, bann la ot i di sé dé maladi émérzan. Lé vré, dizon o plis lomoun lé azé, o plis lé pli fasil tonn si son palto, o plis li dwa èt in pé plis krintif pou son santé, mé tansantan i atak bann mwin vié osi.

Banna i di maladi émérzan, pa touzour ousinonsa plito lo non la maladi la sanzé zordi. Mi ansouvwyin, tanmti minm, navé in vié madam té rèt koté nout kaz é lo vié madam sanm pou mwin in mandoné la tèt la komans bloké, a nou koué nou té i di ? Nou té i di lo madam la ging la foli. Zordi kan mi wa in moun néna ézèymèr mi ropanss lo vié madam, Donkalor déza madam la lavé déza ézéymèr lontan, mi pé pa oublié télman lo madam té fé pitié. In ot maladi té i rod déza dann tan la. In ot gramoun té rèt pli lwin k’nou, lo gramoun té i trann baya, té i trann vèy pa koman.

La osi kan mi rogar byin zordi, pou lo gramoun malad ni dizé dan lo tan lo gramoun la gingn la tranblad, figir a zot boudikont li lavé déza parkinnsonn avan tout. Donkalor bann maladi la, la pa télman émérzan.A mwin ti kolon anndan la, mi pé pa di koman géri bann maladi la, mi lèss sa pou bann éspésialis, mé mwin lé kontan kan mi antann mon parti i pran an kont banna, dan nout program lé prévi in gran sérviss pou zot èk lé zot, ni apèl sa in gran sérviss a la pérsonn !


Kanalreunion.com