Oté

In késtyonn météo gouvèrnmantal ?

Justin / 16 out 2010

Déssèrtin i di konmsa, bann polisyé koméla, na in bon formasyon. Donk, zot i pé byin konprann demoun, zot manyèr viv, zot manyèr réaji. Sa i pèrmète azot gard zot kalm, épi évite pète batay sof si lé byin nésésèr. La pa moin la trouv sa, mé la piblisité pou angante bann jènn pou rant dan la polis. Déssèrtin i pans lo kontrèr, i di konmsa bann polisyé i èm fé lo koboy, é i tap si nana pou tapé, i kaboss si nana pou kabossé !
Alon arvir in pé déssi sak la éspass vantrodi soir... lo ralé-poussé dovan la moské Sinn-ni. Pé sfèr, bann polis la bak la pèrde zot kalm, é zot la larg grénade lakrimozène an paké, pars zot té i san azot ménasé, donk ; i pé dir zot lé pa si tèlman byin formé ké sa ? Lé pa si tèlman grav alor. In bon lékplikasyon dann la transparans, in romontaz brétèl épi lé bon. Mé si sé lo bann promyé, sak i pans la polis lé byin formé na rézon, l’afèr lé pli grav k’ in sinp ralé-poussé, in sinp ral konte. Pars alor, sa i sanm pou moin, sa in n’afèr kalkilé, in déga fé par éksepré, in sort provokasyon.
Lé vré, sa lé in pé dann l’èr di tan, dépi gouvèrnman la France la déside drèss paviyon la sékirité pou son shèf éspèr gingn zéléksyon. Anfin, konm di li konte, sé in késtyonn météo, in késtyonn météo gouvèrnmantal.

Justin

NB : astèr, pou kossa sa i tonm déssi garson madame Dindar ? Pou kossa la rofiz apèze in pé lé shoz ? So kou issi, sré in késtyonn météo l’UMP... I arsanm byin,touléka !


Kanalreunion.com