Oté

In kok pistash dann in mèr démonté !

Justin / 19 mars 2013

Yèr matin, moin la antann in madam dsi in radio. El té apré rakonté èl la fé in vizion : in sounami té apré balèy la kot La Rénion. El l’avé si tèlman pèr ké èl la pran son pti famiy par desou son bra épi èl la mont in pé dan lé o. Dopi l’androi èl i lé, èl té apré prévien domoun té i sar ariv in katastrof shé nou. Lo l’animatris radio té apré koz sanm èl i di aèl èl, nana in prémonision, mé d’apré la météo, na poin arien lé anonsé. El la di èl i koné pa, mé kan l’ariv lo sounami dan la Taïland, èl la rosanti lo mèm z’afèr, in gran malèz dan èl... Moin pèrsonèl, moin la poin l’opinion dsi sak èl i di, mé mi koné kant mèm dé foi demoun na vizion é la pa pou sa k’lé pa vré, la pa pou sa k’lé vré non pli ; touléka pa lo zour, pa l’èr zot la di. Lo madam, pou son par, èl i anons pa lo zour, pa l’èr. Donk, in n’afèr a suiv pou sak i arès in koin zot tèt i travay pa !

Solman lé pa di, in zour in gran ra d’maré i ariv pa dsi La Rénion, kisoi in sounami, kisoi in ra d’maré tou kour. Mi kroi ankor plis dopi lo zour moin la aprann na in sizièm kontinan té i égzis avan rant Moris épi La Rénion : Moin la fine anparl azot Lo Mauricia ! Zordi in pé i di lé pa vré, d’ot i di lé vré... in vré batay pintad rant bann savan. Sak lé sir, sé ké nou, sé in bann volkan la fé anou ; la sort dann fon la mèr, la monté, la monté, la monté — ziska désot lo sièl, konm in poèt la ékri — ziska tan La Rénion la aparèt, épi la grandi ziska son grandèr zordi... Na in dalon la di amoin konm sa, lé près pa sir nana in zour in gran tranblomann tèr isi pars na poin l’androi nana dé gran plak téktonik pou bit inn avèk l’ot konm mové toro épi done in gran sékous magnitid 8, 9, ou bien 10, kas in plak, atir la mèr épi ranvoy ali, konm kan i fé in gran ra d’maré ou sinonsa in sounami.

Sounami la fé l’ot zour la sort dan l’Indonézi anlèr la-ba, épi nou la gingn in pti bout la ké. Mèm si té for, té in bout la ké kant mèm. Volkan, nou nana, é i paré mèm nou na troi. Piton dé nèz, sé lo pli vié é lété lo pli gran, mé na lontan li dor dan son profon somèy. Nou na in shominé sékirité, sé nout volkan. Donk ni pé di arien v’ariv anou, touléka ni pé viv konm si ! Mèm si nou lé an sékirité konm in kok pistash dann in mèr démonté.

NB : Mi di pa sa pou fé pèr d’moun. Mé mi koné bien na d’ot sounami, d’ot tranbloman, d’ot katastrof i ménas anou. La plipar d’tan, sé l’om li mèm lo résponsab... Apré sé bann bon parol, mi souèt zot tout bone zourné, bonuite, bonapéti.

Justin


Kanalreunion.com