Oté

In komansman ! Pars aprésa na ankor dé shoz ki fo fèr

Témoignages.re / 27 désanm 2013

Zéléksyon minisipal i ariv : kandida an kantité é anpliské sa bann list lé long konm in zour na poin dopin. Zélu osi i an mank ar pa, dépi lo mèr, an pasan par bann ladzoin, bann délégé kominoté d’komine, épi bann sinp konséyé, kisoi konséyé lo mazorité, épi konséyé le lopozisyon. Bon pou sa mèm ! Mé na in késtyon mi pans demoun i dovré poz azot dann zot kèr. Kèl késtyon ? In késtyon pou an savoir si sa lé itil pou lo péi. Myé ksa, késtyon pou savoir si zot nora lé moiyin pou shanj lé shoz dan la Rényon.

Répons pou lo promyé késtyon : mi pans zot lé itil avèk zot kalité épi zot défo, bien itil o sinonsa pa tro, mé i fo pa ni obli konm di lo kont, sé la loi ki di kosa zot i pé fé é kosa zot i pé pa fé. Donk zot i pé pa fé in n’afèr demoun i di lé bon, si dann zot konpétans na poin so n’afèr konmsa. In mèr la pa in dépité, li la pa non pli lo gouvèrnman. Donk kan in pé, dann zot kanpagn, i di zot va fé si, zot va fé la, lé riskab si zot lé pa bien informé sa la pa dann zot konpétans. A moins ké zot i pans demoun i atann ki di in n’afèr konmsa, alor zot i di mèm si zot i koné zot i gingn ar pa tienbo promès.

Sak moin nana pou di dmoun sé kan zot i vot pou lo mèr, zot i vot pa pou in konséyé zénéral. Zot i vot pa nonpli pou in dépité, ni in prézidan, donk si zot i vé zot i vot touzour pou in zèl koupé. Lé konmsa é pa otroman... Dakor, mé dann la sityasion ni lé, mi domann amoin si in n’afèr konmsa i pé donn anou satisfaksion. Mi pans pa sé lo ka ! Pars kosa nou la bien bézoin koméla ? In bonpé z’afèr ; mé an parmi ni pé trouv dé-troi zafèr bien nésésèr : travay pou d’moun, sa lé bien nésésèr. La kaz pou d’moun ? Sa nou la bézoin. Bate la mizèr atèr ? Sa in n’afèr sèryé sa. In bon lédikasyon pou marmay ? Sa i mank anou sa zordi.

Mi oi lo parti i domann in sèl asanblé avèk lo bann pouvoir konsèy zénéral épi konsèy réjyonal, Mi pans sa sé in bon komansman pou fé avans lé shoz, dann in bon sans pou nou. In komansman, pars apré na ankor dé shoz ki fo fér.

 Justin 


Kanalreunion.com