Oté

In kord pou kassé, in tramay nou lé mayé dodan si ni vé ansort anou !

Justin / 2 avril 2012

Moin lé sir é sèrtin, si ni ékout bann moun trokalifyé dann lékonomi kapitalis, na poin granshoz pou tir La Rényon dann malizé. Bann shif na la tète dir. Près trant pour san shomèr, soisant pour san bann jenn dann shomaj, plis la moityé d’moun dosou pa d’port la mizèr. Arzout èk sa san vin mil z’ilétré, plis sis mil diplomé avèk bèl-bèl diplome dann shomaj. Mète ankor, par dsi l’marshé rant vinn-sink épi trant mil ménaz apré rode in kaz pou résté. Ni arète la la list bann voiyan dann lo rouz lé ankor long.

Sa sé lo mové koté la pyès, mé moin lé sir nana in bon koté. Mi sava pa di tout, mé konm di kréol, nana z’atou dann nout min. Sé sak nout Parti kominis i di dépi in bonpé d’tan, dizon o moins dépi plann sirvi l’ané 1975, ziska lo plan pou in nouvo kontra sosyal, an passan par d’ote plan nou la fé. Donk , konm di lo kont, si na in koté fas, nana galman in koté pil. Si na in mové koté, nana ossi in bon koté : nout l’ansègnman, nout sistèm santé, la roshèrch i fé dann l’inivèrsité, bann z’avantaj départman fransé, nout bann diplomé, nout savoir fé dann in bonpé domène, la modèrnité nout lagrikiltir épi nout l’artizana é lo rès mi di pa…

Nout l’izolman ? In blag sa ! Pars nou lé dann plin kèr l’oséan Indien é nana in bann péi dévlopé otour nout l’oséan. An pliské sa, san alé fouy tro loin, nou nana in bann kapasité dévlopé nou la près pankor komans toushé : la pèsh dann l’oséan. La pa bézoin ni anparl zordi l’otonomi énèrjétik, mèm si sé in n’afèr lé kapab, par li mèm, amène anou dann shomin dévlopman. Ni sar pa non pli parl la sékirité alimantèr nou na moiyin trapé. Ni pé parl lo ko-dévlopman, lo dévlopaman otosantré, andojène, sansa solidèr. Bin alor, akoz lé shoz i marsh pa ? Pars kékpar, nou lé amaré par in sistèm bann kolonyalis la mète an plas, in kord* k’i fo kassé, si ni vé ansort anou, in tramay nou lé mayé dodan..

Justin

N.B. : sa i apèl monopol, é la pa zordi solman i anparl de sa. Mé nou va arvir la-dsi in n’ot zour.


Kanalreunion.com