Oté

In kouyon lé danzéré, é sa i mank pa isi !

Justin / 15 mars 2013

Lo prézidan l’Island la vni rann vizit lo prézidan Hollande. Sèt-la la trouv arienk in pti domi-èr pou koz sanm li. Domaj ! Pars mèm si lo péi lé pti, li la niabou tir ali dan la kriz... Son prinsipal rokomandasion : "sov lo pèp ; sov pa bann bank". Dan d’ot péi la sov bann bank, mé la anfons bann pèp. Pars la trouv miliar par dsi miliar pou sov la bank, mé l’arzan pou rolans l’ékonomi la pa trouv sifizaman.
L’Island, sa in péi lé dann nor l’Erop. Na poin bonpé d’moun la-ba : 320.000 pèrsone, mé li viv dsi in gran kantité volkan. Si tèlman zordi, bann z’Islandé i shof azot avèk la zéotèrmi. Lo péi lé paré pou vann son l’éléktrisité prop dann nor l’Erop avèk in konduit sou la mèr pou amèn kouran ziska l’Ékos, épi ziska la Oland, épi par la suit amèn ali dan bann péi l’Erop la bézoin l’éstrésité prop. In pé i di konm sa, sé pou sa prézidan la Frans l’avé poin lo tan pou pèrd avèk li, vi k’li nana son salté l’éléktrisité nikléèr pou li plasé... i pé di galman l’Island la domann l’Erop pou arèt in pé bann négosiasion pou li rant dan l’Erop.
Moin la gard in l’émision dann télé. Moin la vi, dann péi-la, demoun i sort Kénia. Moin té a d’mandé kosa bann Kénia i vien fé la-ba. Figuir azot, banna té an éstaz pou oir koman i tiliz la zéotèrmi. I paré bann Kénia nana in gran projé pou fé bann santral l’éstrisité avèk la zéotèrmi. Zot lé an projé, konm sa, trap l’otonomi énèrzétik, épi, si na moiyin, vann kouran bann péi l’Afrik de l’èst. L’èr-la, mon tèt la mèt a travay : nou osi La Rénion, nou l’avé in projé pou fé l’éspèrians la-ba la Plène dé kaf épi pou oir si lé posib dévlop l’énèrji zéotèrmik. Sa té i rant dann trin lo plan pou l’otonomi énèrzétik. Mi souvien kan Didier Robert la fé son gran diskour la piramid ranvèrsé é kan li la di li arèt avèk sa. In bann kriyèr d’nuit la bat la min, la kriyé, konm si zot té i gingn in gran viktoir.
In kouyon lé danzéré, é malorozman, kalité-la, sa i mank pa isi !

NB : I paré, éstèr, in pé i vé artourn an arièr, rolans l’éspérimantasion, mé nou la fine pèrd lo tan ! I rès arienk bann z’il Komor pou koup dovan nou avèk zot volkan, lo Kartala. Mi pans, zour-la, in pé va bat la min pou bann Komor épi sirtou bat tanbour dsi zot prop kouyonis. Konm zot va bat la min lo zour bann Morisien va rouv zot métro lézé.

 Justin 


Kanalreunion.com