Oté

In l’ède inportan, in séryé kou d’min pou nou

Justin / 7 désanm 2010

Moin la byin émé dimansh kan Paul Vergès konm Elie Hoarau la dénons bann rasist, sak i kroi lo tan lontan i arvyin. Banna la di, lé pa normal k’i di déshoz konmsa é k’i fo vanjé pou koup l’artèr bann z’afèr konmsa.

"Kounta Kinté"
Promyé foi défin Lucet Langenier la gingn in zéléksyon Sint-Sizane, in pé la kroir té intélizan gaskone ali déssi son l’orijine afrikène. Konm té i zoué dann télé lo film “Rasine”, é konm l’avé in désandann shèf afrikin, bann kaparèr la trap ali pou fé zésklav ansanm. Bann la Droite vyé blan la nonm ali nom-la, zot té i apèl ali Kounta Kinté. Sa té i fé rir in pé ! Sa té i fé rir sirto bann z’inbésil ! Lucet, sa la pa fé rir ali, mé li la pran nom-la konm in drapo, konm in fizi. Li-mèm té i di partou : « Moin mèm Kounta Kinté ! ». É lo dimansh ansuite, li la kapote son z’advèrsèr, li la fé mord azot la pousyèr.

In pasaz an parmi sak lé pli bèl
Dann kongré la di, avèk juste-rézon, i fo ni koné listoir nout parti, pars nout parti l’amontr anou arlèv la tète, rézisté, lité kont linzistis, lo rasism, l’inégalié, la frode. Nout parti l’amontr anou viv konm lé fam é lé z’onm i doi viv ; Dann listoir nout parti, nana in pasaz Lucet Lagenier la ékri, é pasaz-la, sa lé sir, sé inn an parmi sak lé pli bèl. Sa in paz i fo ni rouv l’èr in pé i mank anou réspé, i mank nout pèp réspé, i mank nout lang réspé, i déréspèk nout z’ansète.

L’èr-la, kroi moin pars lé vré, in boug konm Kounta Kinté, kaf rokoni dovan Bondyé, son légzanp, i pé done anou in séryé kou d’min  !

Justin


Kanalreunion.com