Oté

In l’inyon kont natir ? Sansa in l’inyon bien dann la natir dé shoz ?

Justin / 19 octob 2015

Na poin lontan, in sèrtin zournal la fé parète in sondaz lo bann sondèr la mète près in moi pou fé. In rokor dann in l’androi konm La Rényon. Sondaz-la lété asiréman bidouyé é lo rédaktèr an shèf lo zournal la di par li-mèm i sirkote Bélo, é i soukote Lebreton. In pé i oi sa apré, mé lo kou d’jarnak an trète la fine partir… I fé arien pars tout fason, lo vré sondaz sé lo sis désanm é zour-la nou va oir.

L’èr-la sétaki i donn son l’intèrprétasyon dsi in zistoir manipilé é inn la mèm di lé pa étonan in rézilta konmsa vi ké sé in l’inyon kont natir. Moin la parti oir sa dann bann diksyonèr i ède amoin pou ékri. Moin la trouv kék kozman avèk lo mo kont, konm kont-nasyon, kont-sézon, kont-parti mé mon diksyonèr la rofiz koz avèk moin dosi lo kont-natir.

Alors moin la pans in n’afèr : si ou i fé l’inyon arienk avèk sak lé konm ou, mi pans pa ou v’alé loin. Kominis i fé l’inyon avèk kominis, droit avèk droit, sosyalis avèk sosyalis, trète avèk trète, vandi avèk vandi, intérésan avèk l’intérésan… Ni oi tout suit sa sé in n’afèr i tienbo pa d’bout. Si astèr, ou i fé l’inyon avèk demoun lé pa parèy, i pans pa égzaktoman parèy ké ou, mé si sak i fé l’inyon i partaz in bon z’idé ansanm-avèk… La lé pa parèy ! La lé pi kont natir, mé lé dann la natir dé shoz. Ala in bon téknik d’inyon !


Kanalreunion.com