Oté

In l’okazyon manké pou rapèl anou nout l’istoir dramatik !

Justin / 10 mé 2016

Si mi di azot lo dis mé-donk zordi !-sé in zour d’fèt, moin lé sir zot va domandé si mon koko la fine bloké. Bann sak lé pli informé-donk la gôsh - lé riskab dir amoin oui vi ké sé so zour-la, lo dis mé 1981, ké François Mitterrand la gingn zéléksyon pou ète prézidan La Répiblik ! Mé sar in kanar biensir !

Pou kosa ? Pars lo dis mé sé in zourné nasyonal pou rafréshi nout mémoir dsi la késtyonn la trète épi l’ésklavaz é an mèm tan l’abolisyon pou l’inn é pou l’ot. Lo dis mé ? Sa i tonm bien… mal vi ké marmay l’ékol lé an vakans é bann z’amontrèr nora pa bézoin fatig z’ot tété pou fé rant so poin nout l’istoir dann la mazinasyon bann marmaye. Romark lo vin désanm galman i tonm dann vakans, épi katorz zilyèt épi d’ot gran zour konmsa.

Antansyon nana bann-désiné mé mi kroi, san z’ète sir, ké dann télé i amontr plis mikey, lo lapin krétin, plito ké l’istoir la trète épi l’ésklavaz. Dann lo méyèr dé ka, Rényon promyèr va invit inn-dé tèt dé zèf pou sobatkozé la dsi. Mi pans kant mèm ké lo mèm èr nora bann télé novella dsi in bonpé d’télé. Alor nou sar pa blizé ékout so bann fatigèr d’tèt i vien fé l’intérésan dann nout ti l’ékran.

Romark noré pi arète lo travay kansréti dis minit pou fé konète osinonsa réfréshi la mémoir bann demoun i travaye dsi so bann poinn vizé dramatik dann nout l’istoir. Noré pi fé pass in pti diskour lo prézidan dsi so bann késtyon-la mé pèrsone la pa pansé é mèm la gôch la pa maziné.

Moin lé sir zot l’apré domandé pou kosa mi fé l’èr moin l’apré gougnardé. Poitan non ! Mi vé zis rapèl demoun ké souvan dé foi in bone koz lé dégizé an fète komèrsyal é lé pa l’okazion pou rouvèr in pé nout l’éspri é an mèm tan désikatriz in pé nout boubou.


Kanalreunion.com