Oté

In léstaj pou aprann fé désin konm bana !

Témoignages.re / 10 janvier 2015

Zasasin, kriminèl, lach, dapré zot néna dot mo pou ésplik i tèl karnaj ? In moun i pé azir konm sa ? Inn boug la di dann télé, in boug la di son gran doulèr, li la pèrd tout, anndan la li di, li la pèrd son bann dalon, son bann kamarad, son travay. Boug la té i plèr baya. Boug la i di « di pa bann téroris la lé fou, si ni di sa té konm si ni insilt bann fou ». In kozman i ésplik in pé, pétèt koman zot sérvèl lé finn délavé.

Lèr kilé zot la finn tié trèz, zournalis, désinatèr, la poliss, bou di kont zot la tié nout bann zartis, lo bann pli méyèr tout i di, dan la bann mi koné inn plis, vik li té i désinn pou Lima in zournal mwin té i lir touzour kan mwin té déor. Adié Zorj èk out bann Charlie ! Zot la tié nout lintélizans, la tié nout kiltir, zot i vé tié la libérté. Lo konbat té pa zis, koud fizil kont koud kréyon, mé zot lé mor dobout konm in té i vé.

Bann téroris i sava fé léstaj o yéminn i prétan, zot i rann a zot kont, in léstay pou aprann tié d’moun, zis pou sa. Anou osi ni dovré fé léstay pou réponn. Lé pa tro tar, anparmi bann rézolisyon pou 2015, mi promèt a zot sèt ané 2015 mi sava inskri a mwin pou fé in léstaj, in léstaj pou aprann fé désin konm bana !


Kanalreunion.com