Oté

In lindi byin rordinèr, in lindi son vi la kapoté !

Justin / 27 avril 2010

L’avé in foi in ga. In ga k’i travay dann batiman dépi déza in bon boute tan... in bon métyé, touléka in métyé k’i plé ali é k’i pèrmète ali gingn son soso. La syène, byinsir, épi sète son pti famiy. Moin lé sir, dann son priyèr lo soir, si li di la priyèr, li dévé domann Bondyé pou fé an sorte son sityasyon i bouz pa, i rèss konm k’i lé. Épi, akoz sa va shanjé ? Na poinn rézon, vi k’sa in bon métyé, vi k’li èm sa byin, ké sa mèm son méyèr savoir fèr. Bondyé siouplé, shavir pa ma vi !
In lindi konm tou lé lindi. In pé dir pou komansé, apré i marsh myé. In lindi konm d’abitide : son shèf i tap dann son min, li tap dan la min son shèf. Son bann kamarade lé la… koué d’myé k’sa ? Koué d’myé k’sa... Sof ké momandoné, la sogrétèr i fé apèl ali dann biro. Zis in papyé pou signé. Zis in papyé i di konm de koi li la byin gingn in lète. In signatir, sa i angaz pa. Souvan dé foi, i fé sign aou pou in oui, pou in non. Ou i sign, épi ou i trap lo papyé, ou i pliy an kat épi ou i mète dann out posh ki.
So foi issi, la sogrétèr i domann ali si li lir pa lo lète. Li trouv sa drol… li asiz dann koin in shèz épi ti dousman li démay lo zanvlop, li dépliy lo papyé épi li lir dousman... dousman. Lo syèl i tonm déssi son tète... lé pa vré ! Banna la tronpé... sa lé sir !
In n’afèr konmsa i pé pa ariv ali. Pa li ! Son zyé i fé d’lo, son larm i koul. Li arpète, li arbis dann son tète : "Lisansyé pou koz ékonomik !". Sa la spass in lindi, in lindi byin rordinèr, in lindi son vi la kapoté.

 Justin 


Kanalreunion.com