Oté

In linformasyon zanbrokal ? Pa si inosan ké sa !

Justin / 10 zanvié 2014

Na in pé d’tan kan nou té rogard la télé, nou té i trouv par in koté lo linformasyon"lokal" épi in n’ot koté lo linforasyon La frans épi lo rès lo mond. La ni parl pa dsi lo konténi, pars lo konténi lété é i rès touzour kritikab... La ni parl dsi la form pars koméla, i may ansanm tout kalité linformasyon, si tèlman ké ou lé a d’mandé in laksidan ousa sa la éspasé ; si nana in grèv, ousa sa i éspas, isi ou sinonsa la-ba, dannn nout péi, dann nout réjyon sansa dann péi déor. Na ziska la météo k’i may tout ansanm si tèlman ké kan na in tanpète ou sinonsa in siklone kèl koté li lé, kisa lé ménasé, i fo ou i suiv bien l’afèr pou ou rann kont.

Pétète in pé i pé di sa in lérèr, in n’afèr plito gosh donk si bann éspéktatèr i fé la romark, i pé artourn konm avan... Moin pèrsonèl, mi kroi pa. Pou kosa ? Pars na in pé i rèv konm touzour anmar anou sanm La frans konm i di dann bato fou ! Donk, tout lokazion lé bon é si zaktyalité i pé ansèrv dé sa, tan myé ! Si la météo i pé ansèrv dé sa ? Bravo. Lo pli prinsipal sé fé tourn nout tète pou fé obli anou nou lé rényponé an promyé, nou lé dann loséan indien é ni koné kisa i lé nout bann voizin… Astèr si zot i di amoin sa lé pa fé par éspré, lé ankor pli intérésan pars konm i di lo sibkonsian, koman koman, li nana zafèr pou di é l’èr ki lé lo sibkonsyan bann fézèr linformasion nana konm bi, konm poinn vizé, intèg anou lo plis posib é lo pli vit posib dan La frans...
Arzout èk sa, bann fézèr linformasion zot mèm i koné pi ousa zot lé viré é na dé foi zot i fé in vré léfor pou amontr bann moun déor, zot lé pa anfèrmé dsi La Rényon é zot léspri lé rouvèr ziska La frans, ziska l’Erop. An dé-troi mo, zot sé d’moun bien.

Pétèt zot i pans mi égzazèr ? Talèr somanké zot i kroi moin lé séktèr ? Talèr zot lé riskab dir lo boug i gingn pa fé la diférans rant in bon linformasion épi in mové l’informasion. Kaziman sré la nouritir doné in bann koshon ! Inkyète pa, sa i fé lontan mi suiv azot é mi pans pa dsi lo poinn vi lidantité rényonèz zot i pé roul amoin konm zot i vé dan la farine fasilman konmsa. Donk si zot i vé fé zot linformasion zanbrokal, fé azot ! mé sirtou kroi pa, pou moin , sa in n’afèr inosan. Lé pa si inosan ké sa !

 Justin 


Kanalreunion.com